大茶飯│贏錢要訣靠耐性(青冰)

·3 分鐘文章
贏錢要訣靠耐性
近期市況轉變,又勇又快,或會成為催命符,耐性反而係贏錢的要訣。

去年尾及今年初可算係近年難得一見的旺市,但自2月起,股市明顯轉弱,雖然指數唔係跌咗好多,但都足以輸死人,年頭要贏錢一定要夠勇夠快,因為資金心雄,一有好消息就鬥搶,你諗住排低幾格買平啲,最後只會空餘恨,精神上的損耗亦很大,每日收市累到好似散晒咁,但近期市況轉變,又勇又快,或會成為催命符,耐性反而係贏錢的要訣。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

必瘦站(1830)昨午又出通告,借五.一銷售數字谷吓股價,急漲16%收市,早前股價一度衝至歷史新高7.66元,牌面消息全面向好,復活節銷售掂,老細在場內接連掃貨,由6蚊買到上7.5元,當時戰友在青冰的專頁內留言問股,青冰都係話畀啲耐性等吓,總有機會的,結果創新高後都輾轉下跌了十天,上星期在6.3元樓下任你買,昨天急升後仍未破頂,所以上月如果心急跟老細7.5元都盲掃,現時仍未回鄉呀。

歐舒丹靚數照破頂

歐舒丹(973)去年底公佈半年業績時已經係靚數,1月尾時再出第三季營運數字,其實公司都交代得好清楚,大中華市場好勁,網上銷售好勁,股價翌日急升24%,不過及後股價進入又長又悶的整固期,上星期出了第四季營運數字,其實又係講大中華市場好勁,網上銷售好勁,但股價就順勢破頂。市旺時這些內需概念,隨時就一去不回頭,但遇上股市冷鋒,高估值內需如農夫山泉(9633)及海底撈(6862)等龍頭,全部都跌到一仆一碌,這亦掩護了歐舒丹這些績優股,今日急升唔去追,之後原來仲大把機會買。

以現時的市況及年初相比,其實青冰更喜歡現時這個死死吓的狀態,年頭資金只係集中在某幾個類別的高估值股份,仲要手快有手慢無,真係死唔少細胞,現時新經濟股死晒,資金外流去找其他概念,只要戰友肯做功課,都不難發現市場根本沒離棄績優股,而且仲好好人,一定有個像樣的回調畀你上車,你睇吓早前的航運股中遠海控(1919)及海豐國際(1308),4月中時有一個近兩成的回吐,如不幸高位追咗,隨時止蝕完先繼續升,相反只要有耐性,仍然搵到餐飯吃的。

青冰

http://www.fb.com/chingbing888

本欄逢周二刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能