香港股市 將收市,收市時間:4 小時 30 分鐘

【大茶飯】如何找出港股通新貴(青冰)

上周五恒指公司季度檢討,藍籌成份股未有變動。

上周五恒指公司季度檢討,藍籌成份股未有變動,國指就加入海螺創業(586)及舜宇(2382),不過市場最關心的應該是綜合指數的變動,因為港股通標的半年一次的大檢討,就以這個綜合指數作藍本。

今次綜合指數加入22隻股票,剔除26隻,按理港股通新貴將是那22隻,不過如果戰友懂得細看恒指其他主題指數,你會發現有一個港股通指數,而港股通指數又會有市值分類,又有行業分類,愈睇只會愈亂,今次港股通指數係加入了28隻股,咁究竟係22隻還是28隻呀。

青冰的結論係21隻,但先講這個港股通指數,戰友會發現,28隻新加入的,有些是熟口熟面,中國東方教育(667)、小米(1810)、美團(3690)及海底撈(6862),北水不是每天都在買賣嗎?點解又會再加入呢,青冰沒有深究原因,反正應該都冇人會睇港股通指數,所以最正統的,還是去看恒生綜合指數的變動。

恒生綜合指數股 非照單全收

這次加入的22隻,滬深交所並不會照單全收,兩個交易所都有一個滬深股通業務實施辦法,最近一次修訂是去年12月,基本上都係講會根據恒生綜合指數而加,只係同股不同權係會有一個半年期限制,市值及成交的要求,仲有就是A+H股的股份,只要有股份在A、H市場同時上市,基本上係不需要等恒生綜合指數季檢,都可以在率先加入,前提係A股已經上市超過十日,而這個亦是較少投資者留意的,印象較深刻的是福萊特玻璃(6865)當時A股上市後,H股狂炒,炒的正是港股通在10日後會率先加入。不過實施辦法有幾類股係冇包括的,同時都冇寫明會排除,就是ETF、REITs、合訂證券及第二上市兼同股不同權股份,要再另議囉。

富豪產業信託(1881)因為其REITs性質就唔入得喇,所以結果是有21隻加入,而易居企業(2048)在2018年加入過,又在2019年3月被剔除,真係彈出彈入啊,其他20隻全新的,究竟邊隻值得留意,之後再研究吓。

青冰

www.fb.com/chingbing888

本欄逢周二刊出