【大茶飯】零息後侵侵仲有乜招？（青冰）

聯儲局在兩星期內，兩度在非會議期出手減息，總共減了一厘半。

聯儲局在兩星期內，兩度在非會議期出手減息，總共減了一厘半，亦是袋裡的全部子彈，而剛剛這一次更宣佈了新的QE，以兩次的即時市場反應來看，都是非常悲觀，執筆之時，美股期貨在星期一的亞洲時段，再度跌5%，又熔斷喇。

本來聯儲局是在周二、三舉行會議，今次咁急提前兩天出手，當然給予市場一個很利淡的訊號，似乎真係好大鑊喎，不過只要大家有睇外圍地區的疫情新聞，都知道係好大鑊，再加上自兩星期前突然減息後，聯邦基金利率期貨，一路都係預期，今星期開會後100%會減息，只係減0.75還是1厘，現在提早兩天減，並取消會議，或可理解為配合周一晚的G7元首視象會議，提前做嘢，免得市場認為大手減息係G7會議的結果，最大的分別就係，貨幣政策係我們美國自行的決定的，因為侵侵經常都話，要早過對手，而不是跟着對手減。

隨著鮑威爾表明不會用負利率政策，即係聯儲局不能再減息，最多就是加大規模QE，而市場就開始幫侵侵諗，仲有咩工具可以救市呢？最近聽到兩個方法，禁沽空及入市買股。

禁沽空+入市買股？

在2008年金融海嘯時，美國曾經禁止沽空金融股，咁都可以理解嘅，因為當年主要都係金融股的流動性危機，一邊注水另一邊唔畀你沽空，的確係可以幫金融股保命，但戰友又要諗吓，今次目標股份係乜呢？其實係整個市場，金融股面對零息係好大鑊，但都未至於去到執笠的地步，所以若要禁沽空，莫非要整個市場都禁？作為全球股市之龍頭，出此下策定必被人笑，所以可能要穿底再穿底，先敢出招。

入市買股，全球最威的當然是香港啦，仲整埋個盈富基金（2800）添，但你又要留意返當年港股受亞洲金融風暴打擊，本身已經跌咗好耐，再遇上惡意沽空，最後才出招掃貨趕走敵人。坦白講句，美股自海嘯後一直升，標普都升了4倍，上個月仲創緊新高，現在高位回調25%就要入市買股去托，實在予人口實，不過如果係侵侵連任的暗黑招數，就另計啦。

相信本文刊出之時，G7在會後應有進一步行動，如果都仲係一些空洞之詞，相信個市難免要再挨一棍。

青冰

http://www.fb.com/chingbing888

本欄逢周二刊出