雅虎香港財經 太唔是何｜搬屋搬寬頻服務 俾人耍咗一輪（上）｜400歲人瑞
停咗超過一個月寫稿，400歲人瑞又返嚟啦！呢個幾月好忙！過年嗰排返咗香港探親拜年一轉，近排就忙住準備搬屋。講開搬屋，莫講話倫敦，即使喺香港，搬屋都的確有好多嘢搞。又要申請水電、又要做清潔、又要睇下間屋有冇嘢要執漏等等。今日就想同大家講人瑞喺倫敦申請搬遷寬頻嘅經歷⋯⋯以為好簡單嘅事，結果搞到好鬼死複雜。
當1月中時確定咗3月中搬屋嘅時候，第一時間就查下要唔要轉自己嘅寬頻服務。因為而家用緊嘅係BT，地位就好似香港嘅HKT咁：有啲貴。結果發現原來10個月前申請BT嘅寬頻時，簽嘅係一份24個月嘅合約，所以就無得轉，但有得「享用」免費嘅搬遷服務。
人瑞就上網睇下點樣享用搬遷服務：網上就叫客戶打電話去做。但由於怕聽口音極重嘅英文，又怕一陣聽電話嘅時候會錯過一啲重要嘅資訊，所以人瑞就選擇咗直接去屋企附近嘅BT專門店查詢及辦理。因為10個月前都係去BT專門店搞寬頻上網服務，覺得當時嘅店員做得幾好，所以今次都想再去專門店搞。
入到店就睇到三四個店員都在幫緊客人，另外有兩三個客人坐咗喺度等人服侍，即係條隊前面仲有兩三個客啦！情況有啲不妙（因為通常咁都要等幾耐下），但係人瑞得閒嘅就只有呢一日，唯有硬著頭皮等下啦。碌咗手機半個鐘，終於有個店員姐姐行埋嚟問係咪輪到人瑞，咁其實仲有一個伯伯喺人瑞入嚟嘅時候已經坐咗喺度，咁人瑞就指一指個伯伯，向店員姐姐示意應該係伯伯先。於是又等咗大概10分鐘，另一位店員姐姐A就過嚟招呼人瑞嘞：
👩🏾店員A：有乜嘢可以幫到您？
👴🏻人瑞：您好呀！我要搬屋啦！我屋企個BT寬頻想搬去新地址繼續用，係咪可以喺度辦理？
👩🏾店員A：係呀！請您俾您嘅資料我查一下
咁人瑞就俾咗自己嘅郵遞編號、新舊住址、電話同埋姓名俾店員A查下，店員A跟住就遞咗部平板電腦嚟：
👩🏾店員A：請您喺度輸入返你賬戶密碼
人瑞入完，出咗個「密碼錯誤」嘅訊息。
👴🏻人瑞：咦？！個密碼錯咗喎，但我今朝才用過嚟
人瑞再入多次，都係錯。
👩🏾店員A：唔⋯⋯等我打上總機問下先
店員A即刻打電話問點算，同電話嘅另一邊（即係「總機」）講完一大輪後，佢叫咗另一邊同緊另一個客人處理事務嘅店員B姐姐過嚟。佢哋傾咗一輪，就同人瑞講：
👩🏾店員A：「密碼錯誤」嗰度唔緊要，我哋店員B會同我一齊幫您辦理呢個手續
👩🏼🦱店員B：頭先我哋同事打咗電話上去問過，其實我哋公司BT嘅寬頻服務而家就會陸續轉為另一個品牌EE，所以開唔到新嘅BT服務俾客人新嘅地址，所有新嘅服務都要轉用EE為品牌，所以要幫先生開過另一個EE嘅新合約。我哋幫先生您查咗，您而家用緊嘅月費可以照舊，但新嘅EE合約可以俾到更快速嘅寬頻服務俾您！
👴🏻人瑞：咁⋯⋯我即係要簽過一張新嘅合約？新合約係幾多個月？
👩🏼🦱店員B：係呀！新合約都係24個月，但月費不變、速度更快喎！
呢個時候，原本店員B服務緊嘅客人忽然醒覺自己被店員B「遺棄」咗，大聲叫嚷，店員B就大聲回應叫佢等多5分鐘。
👴🏻人瑞：但係我本身同BT份合約未完約，應該仲有13、14個月度，咁嗰份約點算？
👩🏼🦱店員B：呢個就要先生自己打返去BT熱線度取消啦
👴🏻人瑞：吓？！你呢度唔係BT專門店嚟嘅咩？你呢度可唔可以幫我取消埋？
👩🏼🦱店員B：對唔住呀！取消合約嗰度，要客人自己打電話上去取消㗎，我哋呢度做唔到。不過由於BT寬頻將來都係會轉做EE品牌，所以客人只要訂購咗EE嘅寬頻服務，同BT熱線嘅同事講返情況，同事都會豁免客人提早終止舊合約嘅所有費用及罰款嘅
👴🏻人瑞：即係我要自己打上去取消，同埋話俾佢聽我申請咗EE寬頻，咁BT就會豁免我提早終止合約費用。唔⋯⋯（人瑞故意顯露猶豫嘅神色）
👩🏾店員A：（呢個時候忍唔住加把嘴）其實如果客人有懷疑嘅話，我哋嘅合約都有14天冷靜期，客人可以喺呢段期間隨時取消
其實既然最後都係要人瑞自己打電話上去搞嘅話，人瑞做乜事要行入呢間BT專門店呢？但事到如今，人瑞只係想快啲搞掂件事，於是就範。
👩🏼🦱店員B：想問先生想幾時喺新地址安裝？
👴🏻人瑞：3月15日
👩🏼🦱店員B：好，咁張電子合約而家搞掂咗。呢度係先生嘅個人資料、新地址、安裝日期，合約期為24個月，月費同而家BT嘅月費係一樣，如果無問題，就喺度簽個名吖
👴🏻人瑞：咦？！個安裝日期點解係2月6日嘅？
👩🏼🦱店員B：係呀！唔好意思，因為而家個系統最遠只可以揀到2月6日，所以我撳咗2月6日先，搞掂咗份合約、開咗個戶口，我就會幫先生打返電話上總機叫同事人手改返去3月15日㗎啦
👴🏻人瑞：係呀！2月6日我出咗國，安裝唔到㗎！
👩🏼🦱店員B：唔駛擔心！我一陣就會幫先生打電話改返
咁人瑞就簽咗個名，然後就收到呢份電子合約嘅電郵，又有手機短訊恭喜成為EE客戶。
（呢度要間一條橫線先，因為簽咗份合約之後，人瑞覺得自己由一個被兩位店員姐姐熱情招待嘅客人，變成另一個被「遺棄」的客人了）
-————————————————————————————
店員B隨即問人瑞攞部手機出嚟，開啟喇叭模式，打上「總機」。
📱手機喇叭：您好！歡迎致電EE客戶服務熱線，寬頻服務，請按「1」字⋯⋯
乜原來所謂嘅「總機」係客戶服務熱線，唔怪之得佢要開喇叭模式，方便佢一路等、一路做其他嘢。店員A亦行開去咗唔知邊度了。
👩🏼🦱店員B：先生請您喺度等有人接聽嘅時候話我知，我去睇睇我之前個客人先
如是者，人瑞就揸住部手機喺度等人接聽，等咗大概30分鐘，終於有人接電話，人瑞隨即將自己部手機塞俾正在服務另一位客人嘅店員B。店員B再一次遺棄佢之前嘅客人，和「總機」嘅同事討論咗一陣然後收線，一邊交還返部手機、一邊同人瑞講：
👩🏼🦱店員B：先生唔好意思呀，份合約因為啱啱先做起，所以「總機」同事暫時未能夠喺系統度見到您張單，佢哋話要大概48小時內先會見到，所以轉安裝日期嗰度，都要兩日後才可以由總機嘅同事轉。
👴🏻人瑞：吓？！咁要我自己打上去？
👩🏼🦱店員B：（笑笑口）當然唔駛啦！先生你可以兩日後再嚟返呢度、搵返我，我幫先生再打上去轉安裝日期咪得囉！
👴🏻人瑞：咁咁咁⋯⋯我而家仲有咩需要搞？
👩🏼🦱店員B：無㗎啦！搞掂晒！多謝先生成為EE寬頻服務嘅新客戶，記得兩日後再返嚟搵返我呀！拜拜！
人瑞當然記得仲要返屋企取消原本BT份舊寬頻合約啦，究竟係咪咁順利？即刻睇埋下集啦！
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
