太唔是何｜搬屋搬寬頻服務 俾人耍咗一輪（下）｜400歲人瑞

人瑞申請BT搬遷寬頻，走去BT實體店搵店員幫忙，結果店員唔係幫手搞搬遷，而係開咗張BT旗下另一品牌EE嘅寬頻新合約，仲叫人瑞自己返屋企打電話取消BT嘅舊合約。不特止，安裝新寬頻嘅日子仲要係入錯嘅，要兩日後再返實體店搵店員幫手打電話改返個安裝日期⋯⋯ (Photo by Michael McNerney/SOPA Images/LightRocket via Getty Images) (SOPA Images via Getty Images)

上回講到，400歲人瑞申請BT搬遷寬頻，走去BT實體店搵店員幫忙，結果店員唔係幫手搞搬遷，而係開咗張BT旗下另一品牌EE嘅寬頻新合約，仲叫人瑞自己返屋企打電話取消BT嘅舊合約。不特止，安裝新寬頻嘅日子仲要係入錯嘅，要兩日後再返實體店搵店員幫手打電話改返個安裝日期⋯⋯

人瑞返到屋企，上網開返自己個EE戶口嚟睇下，發現可以自己上網站改個搬遷日期，只要兩日後見到自己張新合約出現喺自己個戶口度就可以。上網自己搞係人瑞最喜歡嘅做法，一於就咁話，今次實體店嘅體驗唔係幾好，免得過都盡量避免再去。

如是者兩日後嘅早上，人瑞再上網睇下自己個EE戶口，見到張新合約嘅詳情啦喎！太好啦！跟手就打電話俾BT熱線取消舊合約：

👨🏼BT客服A：您好！有乜嘢可以幫到您？

👴🏻人瑞：你好呀，我本來係想搞搬遷寬頻嘅，不過去到你哋BT嘅實體店，店員幫我開咗張新嘅EE合約，佢哋話可以打上嚟取消舊BT合約，想搵你幫幫手！

BT客服A於是問齊本人嘅個人資料及搬遷資料等等，等咗一陣：

👨🏼BT客服A：先生，其實您可以就咁做搬遷就得㗎啦，唔需要開新合約取消舊合約嘅，呢度我可以幫您搞掂佢！

👴🏻人瑞：啊！好呀！你幫我搞啦！咁張新合約我係咪要自己打去EE度取消？

👨🏼BT客服A：係呀！我哋呢度係BT，所以先生要自己打去EE度取消啦。想問返先生舊地址嗰度嘅寬頻服務想幾時終止？

👴🏻人瑞：咦？新舊地址嘅寬頻服務可唔可以喺唔同日子開通同埋終止？即係新地址可以開通咗先，然後舊地址可以遲幾日先終止？

👨🏼BT客服A：可以呀！

👴🏻人瑞：咁幾好喎！我搬屋嗰日係3月15日嚟嘅，新地址可唔可以3月13日就開通？舊地址可唔可以3月17日先終止？

👨🏼BT客服A：可以呀！咁我哋會有個安裝郵包寄去新地址嘅，師傅3月14日上新地址安裝有無問題？

👴🏻人瑞：無問題！

👨🏼BT客服A：好，幫您搞掂咗搬遷服務啦！先生今日晏晝就可以喺網上面自己個BT戶口睇得返呢個搬遷預約詳情！

如是者人瑞喺非常滿意嘅心情下結束咗呢次通話，然後當然就係打電話去EE取消上次喺實體店份新合約：

👩🏾‍🦱EE客服：您好！有乜嘢可以幫到您？

👴🏻人瑞：你好呀，我本來係想搞搬遷BT寬頻嘅，不過去到BT嘅實體店，店員幫我開咗張新嘅EE合約，佢哋話可以之後取消舊BT合約，不過我今朝打去BT熱線，佢無幫我取消份BT舊合約，反而幫我搞掂咗個BT寬頻搬遷，所以我而家唔需要EE啦，你可唔可以幫我取消咗份EE新合約？

EE客服可能都好明白人瑞被你哋班店員耍嘅心情，所以喺核對完所有資料之後：

👩🏾‍🦱EE客服：先生我已經幫您取消咗張新合約啦，仲有咩可以幫到您？

👴🏻人瑞：係咪可以喺網上查返張新合約已取消咗？

👩🏾‍🦱EE客服：應該過多兩三個鐘晏晝就睇到！

👴🏻人瑞：好的！謝謝你！

睇到呢度，係咪感覺好順利呢？但人瑞知道，喺呢度無嘢係可以咁順利嘅！所以打完呢兩個電話之後，就等晏晝嘅來臨，一路查返自己BT同EE兩個戶口搬遷同埋合約詳情有冇更新。

果然不出人瑞所料，雖然EE網頁上面顯示份喺實體店搞嘅新合約已取消咗，但BT個搬遷預約出咗問題：舊地址服務終止日期同埋新地址服務開通日期，竟然都係2月15日？點解會係2月15日？人瑞立即打電話俾BT熱線啦：

👨🏾‍🦱BT客服B：您好！有乜嘢可以幫到您？

👴🏻人瑞：今朝我打過嚟搞寬頻搬遷，但而家上網睇返個預約資料，發現個舊地址服務終止日期同埋新地址服務嘅開通日期都錯咗！

BT客服B於是問晒人瑞所有相關資料後：

👨🏾‍🦱BT客服B：咁先生而家係3月15日搬，係咪？

👴🏻人瑞：係啊！

👨🏾‍🦱BT客服B：咁我幫先生將舊地址嘅終止服務日期設定喺3月15日，新地址開通服務日期設定喺3月16日，師傅3月17日嚟安裝，咁樣有冇問題？

👴🏻人瑞：可唔可以新舊地址服務日期有幾日重疊？即係新地址嘅開通日期早過舊地址終止服務日期幾日咁？

👨🏾‍🦱BT客服B：咁唔得㗎喎，搬遷服務只可以新地址嘅開通日期遲過舊地址嘅終止日期

👴🏻人瑞：原來係咁⋯⋯咁照你嘅意思去做啦！謝謝您！

如是者，人瑞喺第二日朝早再上網查返，EE嘅合約係取消咗，BT嘅搬遷服務會喺3月15日終止舊地址嘅服務，3月16日開通新地址嘅服務，3月17日會有師傅上新地址安裝。大功告成！

此後都無再返過去實體店，唔想去。人瑞似乎喺呢件事入面學到一啲嘢：

• 凡事一定要睇清楚，因為錯嘢係經常發生：Anything that can go wrong will go wrong.

• 上網自己搞當然係最好最可靠啦，但有時無得上網搞，就寧願打電話搞，都唔好去實體店搞啦！

400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯

本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。

留言、給讚、追蹤、分享，請往Facebook專頁：https://www.facebook.com/thames400