太唔是何｜睇場演唱會 都要買保險？為乜？｜400歲人瑞

話說400歲人瑞見到MIRROR都要嚟英國倫敦O2開演唱會，心情興奮，想分享一下喺倫敦O2睇演唱會，原來都會叫大家買定保險！

話說400歲人瑞見到MIRROR都要嚟英國倫敦O2開演唱會，心情興奮，社交媒體上好多「移英港人」群組都有搖旗吶喊助威。400歲人瑞又想分享一下，喺倫敦O2睇演唱會，原來都會叫大家買定保險！

唔知係睇親演唱會都係要咁，但400歲人瑞喺倫敦O2睇過兩場演唱會，兩場演唱會都會叫你買保險。係咩保險嚟嘅呢？就係保你睇到場演唱會嘅保險，萬一因故你無法睇到演唱會，保險公司就會作出賠償。

咁保障範圍係點㗎呢？嗰兩次演唱會分別係由唔同嘅保險公司承保嘅，但大致上都係差唔多。就係只保一樣嘢，就係入唔到場睇演唱會，當然有特定原因嘅範圍啦，例如有以下嘅原因（留意每份保險嘅範圍都唔同，以下所講嘅原因未必係每份保險都包）：

• 嚴重疾病

• 你出現嘅病徵令你被拒絕入場，又或者因而被拒絕乘搭交通工具抵達場地

• 嚴重受傷

• 身亡

• 公共交通工具取消服務，令你不能抵達場地

• 因為屋企俾人「爆格」、又或者係屋企受天災破壞，甚至係屋企俾架飛機或汽車撞冧咗（佢真係咁寫㗎！），而需協助警方調查

• 你買咗張飛之後發現自己大咗肚，而醫生又建議你唔好大住個肚去睇演唱會

• 你買咗張飛之後，俾公司裁員

• 你買咗張飛之後，俾公司調咗去100英里外嘅地方長期工作

• 前往場地嘅交通工具出現意外或故障，又或者遇到交通擠塞逾兩小時，令你在無其他可行途徑之下無法抵達場地

• 前往場地嘅車票被盗，又無法有其他合理方法抵達場地

• 俾人偷咗張演唱會飛，而主辦機構又唔再發張新嘅飛俾你，令你入唔到場

• 因要覆行陪審員責任或出庭應訊

睇落保障範圍都幾廣泛咁噃，但原來有啲情況亦唔保㗎！例如：

• 主辦機構取消活動

• 一直存在嘅疾病、受傷及因而導致嘅身亡情況

• 買完飛之後你唔想去或無興趣去

• 自殺、自殘或傷害自己

• 因服用毒品令自己無法入場

• 因飲用酒精類飲品令自己無法入場

• 因寵物去世令自己無法入場

• 門票平過£10

戴返頭盔先，當然上面只係例子，仲有好多未講嘅，同埋間間保險公司嘅範圍都唔同，所以大家如果真係要買保險，就自己睇清楚啦！至於會賠幾多呢？一般嚟講，最多都係賠返張門票嘅價格俾你。保費方面，兩張百幾鎊嘅門票，保費大概十幾鎊啦。上次400歲人瑞去買飛期間，都驚驚地自己會中新冠，所以都買定先。最後無事。

400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯

本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。

留言、給讚、追蹤、分享，請往Facebook專頁：https://www.facebook.com/thames400