雅虎香港財經 太唔是何｜英國睇樓初體驗（上）｜400歲人瑞
本欄〈太唔是何〉首次登場，各位多多指教！本欄旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
既然首次登場，也就跟大家講講筆者最近的一個「首次」經歷，是在上周末首次為買樓而睇樓嘅經歷。事緣筆者和Partner兩人來到倫敦半年有多，深感租金上漲速度的恐怖，所以萌生「不如試下買樓」嘅想法。然後由於間唔時睇下網上樓盤資訊，結果Facebook就狂派倫敦樓盤廣告俾我睇，「狂」嘅程度係每兩個post就會有一個係倫敦或周邊嘅樓盤廣告（從而認識倫敦之大、樓盤之多），咁啱俾我碌到一個喺隔籬鎮又啱我哋「筆直」嘅新樓盤，於是按下「查詢」鍵，留低電話電郵資料，獻上我哋嘅第一次⋯⋯
隔咗兩日，有一個操輕微異地口音英語的女士打電話給我（我不講是甚麼地方的口音了，要學習互相尊重和與各民族共融），問我係咪有興趣去睇樓，簡單問咗我一啲對物業嘅要求，例如價錢、幾多間房、做唔做按揭等等，然後就約我在上周末下午一時到物業銷售部安排睇樓。
喺香港有睇樓經驗嘅我，嚟到英國卻係第一次。我哋嘅目標係一啲類似香港嘅一房或兩房嘅apartment，新樓或二手樓均可。由於工作關係需要經常來回倫敦市中心，所以最好喺倫敦zone 2至zone 4，附近步程內有鐵路站、購物點就ok，當然仲有啲條件如果可以符合到就更好啦，例如樓層、景觀、座向等等。
喺體感溫度只有零下五度嘅星期六下午，包到成隻粽咁去到個樓盤所在嘅屋苑。整個屋苑大致分三期發展，第一期已經入咗伙有人住緊，第二期就起緊而家賣緊，第三期就仍然係一塊平地未郁，全部大概有十幾廿幢，算係一個幾大型嘅項目嚟。我哋係嚴寒嘅氣溫下搵咗一陣先搵到嗰個位處屋苑中央嘅銷售部，途中經過啲公園、花園、健身室咁，感覺都唔錯。
我哋早到咗五分鐘，銷售處有個無人嘅接待處，入面有三位操普通話嘅男女混合買家，同一位操國語嘅女銷售員在介紹樓盤。之前打俾我嘅女士又無留低電話，於是我哋就搵個位坐低等。聽住普通話與國語互相交談的情景，配合嗰啲樓宇模型，個感覺就好似去買大灣區嘅樓咁（利申：400歲人瑞未睇過亦未買過大灣區樓盤）。
外面好凍、售樓處好暖。不一會打俾我嘅女銷售員果然準時來了，簡單介紹了一下，飢寒交迫之下俾咗杯熱飲俾我哋，然後就表示佢有另一個客要見，所以會搵佢嘅同事銷售員B嚟招呼我哋。（我覺得自己係一個波）
銷售員B係一個後生仔嚟，俾我嘅感覺係不斷問我問題，例如問我「筆直」係幾多呀？（問呢個都正常嘅⋯⋯）自住定投資呀？會唔會考慮買大啲呀？而家租樓嗰度每個月租金幾多呀？會唔會買埋車位呀？可能我哋都有話直說啦，俾佢套晒料知道其實我哋係剛剛夠錢買最平嗰堆單位嘅「『相對』窮L」，而我哋其實都同佢講明「我第一次（睇樓）㗎咋！（你唔好逼我啦！）」，所以好多嘢都想睇多幾個盤先決定。
究竟套完我料之後，銷售員B會點樣對待我呢？睇示範單位嘅情形又會係點？個單位值唔值得我落訂呢？大家要即睇《英國睇樓初體驗（下）》。（睇咗成千字我估你哋都攰㗎啦，抖抖再睇埋下集）
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
留言、給讚、追蹤、分享，請往Facebook專頁：https://www.facebook.com/thames400
