雅虎香港財經 太唔是何｜英國睇樓初體驗（下）｜400歲人瑞
上回《英國睇樓初體驗（上）》提要：去到售樓處俾人當波交咗俾銷售員B之後，銷售員B就問咗我好多問題，俾佢知道咗我其實係一個「『相對』窮L」。這回就要同大家講下銷售員B喺接下來嘅睇樓環節，會如何對待我哋。
問完問題之後，銷售員B就表示要等個同事交返條示範單位鎖匙返嚟（我估係操國語嘅女銷售員攞咗去），之後才可以安排我哋去睇示範單位。自此之後，佢就返埋位「篤手機」，由得我哋自己喺嗰啲模型度「漂流」，研究下啲單位嘅東南西北。（呢個時候，第二組操北方普通話的買家由之前俾熱飲我哋嘅女銷售員帶領進入銷售會場參觀。）
等咗15分鐘，終於可以去睇示範單位，其實都係第一期嘅單位嚟，俾你睇下交樓標準質素咁咁咁，例如送啲咩家電、裝修係點樣，仲可以從高啲嘅地方（其實都只係三樓，喺英國算好高㗎啦！）睇下遠啲嘅風景咁。簡單介紹完後，銷售員B又自己行埋一邊篤手機，咁我間唔時都有啲問題問下嘅，例如每年地租幾多、管理費幾多、個通風窗口喺邊度咁，佢都回答到個「大約」答案嘅。
個盤其實都幾好㗎，向正南（冬天有陽光好緊要！），一房但有五百幾接近六百呎，有齊家電裝修，由預想圖睇日後係望公園及水塘景（非常好view），距離鐵路站五分鐘步程（非常方便），附近都有巴士站、超市及大型商場，所以我哋都十五十六。我哋最大嘅心結，就係呢個係「第一次」，真係未下到決定呢！
睇完個盤，銷售員B即刻問，點呀？鍾唔鍾意呀？想唔想落訂？不難理解佢對呢個盤係充滿信心，因為睇完個盤我都諗唔到我有咩理由唔買。不過400歲人瑞做人咁耐，知道「冷靜」嘅重要性，所以都同銷售員B講：個盤真係好好呀，我哋都好鍾意，不過我哋想再睇多幾個先再決定，不如咁啦，你可唔可以俾你卡片俾我，我之後聯絡你？
可能「運桔」味太濃，銷售員B笑笑口回答：啊！無問題！不如我email埋樓盤詳細資料同埋我嘅聯絡方法俾你啦！我心諗，咁都好，於是就答應了，然後就講聲拜拜等佢send email俾我⋯⋯
一直到今日都在等⋯⋯（抬頭望星空發夢 仍然自信 等到你會破例答覆我一封）
嗯！都係嘅，有一組又一組嘅操普通話買家嚟睇樓，我哋呢啲睇完又唔落訂嘅，為咩要嘥時間send email俾我哋呢？
喺體感溫度只有零下五度的星期六下午兩點幾接近三點，我在倫敦zone 3的一個巴士站，等咗13分鐘巴士離開。睇樓旅程結束。
後記：其實離開咗個屋苑，嗰區就係一個舊區，屋苑外都係啲殘破嘅舊樓（有人住），商店都係新移民（非華人）開設嘅，感覺太過「異國風情」（sorry所謂「異國」唔係英國）。有朋友表示該區會陸續重建，未來應該會愈來愈好。唔⋯⋯我都唔知會重建幾耐（以英國速度計），而且我又「400歲」了⋯⋯
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
