雅虎香港財經 寶寶大過天｜麥皓兒暴脹身型網民唔認得 1年減35磅搣孕味
TVB劇集《寶寶大過天》正在熱播中，馬國明和岑麗香演繹為人父母嘅悲喜苦樂，商天娥亦喺劇中飾演馬國明媽媽，早前劇情講述佢回憶後生嗰陣獨力照顧馬國明嘅片段，令觀眾留意到飾演商天娥後生版嘅麥皓兒（Cayley）演出，大讚佢嘅喊戲感動，不過亦將焦點放於麥皓兒嘅暴脹身型。
麥皓兒參選2007年香港小姐競選而入行，曾擔任《味分高下》味之天使「忌廉」、《東張西望》主持，多套劇集演出，亦推出過《請你食麺》及《食甜品》等「洗腦兒歌」。當時麥皓兒身型仍屬苗條纖瘦一族，直至早幾年開始發福，佢曾經喺出席活動向傳媒表示自己好大食，可以用好多錢去買零食：「我有個花名叫黑洞，我好擦得，食量超過男士，一星期食四晚放題，一次過可以食兩盒燒味飯，壽司都食到30件以上。」仲話因為之前修讀學士學位嗰陣，成日坐係電腦前寫論文，無咩郁動，同埋需要食甜嘢先有靈感寫論文，食多咗嘢又加上少咗拍劇同做運動以致發胖。
其實唔止一年前接拍嘅《寶寶大過天》令其身形受批評， 2020年播出《機場特警》、《降魔的2.0》等劇集，網民紛紛留意到麥皓兒發福身型，仲以「肥到認不到」同「孕味」嚟形容佢。麥皓兒透露自己一肥就會全身肥，由入行90幾磅去到最高峰超過140磅，自己亦意識到身型同選美嗰陣相差成個碼，決定的起心肝減肥，不過喺減肥期間就接到《寶寶大過天》嘅演出機會，監製指麥皓兒喺劇中飾演新手媽咪，啱啱生完仲未收身，有肉地都係合理，所以嗰排就停咗減肥。而麥皓兒宜家已經成功減走35磅，主要戒食宵夜、均衡飲食、以及做帶氧運動，例如一星期跑3次步，每次跑4k，又有搵教練做核心肌肉訓練，同埋與男友丘梓謙雙人跳繩。不過，麥皓兒表示體重仲未達到心中所想嘅目標，希望自己個身型狀態可以仲fit過選美嗰陣。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
