尊尼特普獲賠千萬美金 來港置業有乜選擇?
尊尼特普(Johnny Depp)與前妻Amber Heard互告誹謗,最終尊尼特普獲賠千五萬美元(約1.17億港元),究竟拎住呢筆賠款,Johnny哥來港置業可以有乜嘢選擇?
拆解Johnny哥置業選擇前,先要計清楚這筆賠款可以用作置業嘅預算。官司戰係燒銀紙玩意,今次訴訟戰,Johnny哥動用7名律師,每名律師平均時薪約600美元,但加上後勤員工、出差費、堂費等開支,有律師指保守估計Johnny哥要支付550萬律師費。扣了這一筆,再加上來港置業雜費,以六千萬港元作為置業預算就較均真。
六千萬港元似乎係大數目,但Johnny哥貴為國際巨星,選擇物業級數都要符合其身份,有了這道關卡目標就唯有瞄準一線豪宅。熱門選擇係九龍站上蓋物業,除了係鐵路交匯處,仲食正西九文化區熱潮,加上圓方匯聚頂尖名店及酒店,切合Johnny哥身份。
翻查九龍站現正放盤紀錄,君臨天下一座三房套,面積1076方呎,賣點係享有廣闊維港景,論位置及景觀兼預算,都算符合Johnny哥身份及要求。唯一可惜係以國際巨星而言,面積仍算係「細單位」,不過當投資仍算唔錯。
海外國際巨星可能較熟悉港島區,特別係方便到中環的中半山地段,或更合Johnny哥口味。由長實發展,位於中半山堅尼地道4號的君珀,屬於中半山樓齡較新豪宅。如果唔介意低層,三房套1452方呎叫價6300萬,大廳設有落地玻璃可享廣闊視野。想住大一點,可考慮樓齡較高的嘉富麗苑,兩房一套1588方呎叫價5800萬,單位更設有新淨豪裝,可以即買即放租。
Johnny哥喜歡自由自在,亦可能鍾情淺水灣豪宅。例如5500萬可入手The Beachside,面積達1436方呎,並附有豪裝。另外5700萬可入手淺水灣道37號,三房套面積1227呎,大露台可享廣闊海景。
不過從現實角度考慮,Johnny哥拎住一千萬美元,當務之急反而係減債。年前Johnny哥自爆由於前經理人無幫佢報稅,結果令他揹上一億美元債務。現時美國不斷加息,Johnny哥借私人貸款交稅,有這一千萬美金,至少可以幫輕唔少利息負擔及真正將生活還給自己,海外置業大計,還是留待將來復出連環拍戲搵到快錢再算吧。