從夜冷行情 見執笠潮
大家都知經濟衰退來襲,但失業率仍係輕微下跌,將軍澳新盤又掀起排隊搶購潮,表面睇又唔太衰。如果想探知經濟風向,尚有一項指標:夜冷行情。
經歷過沙士應該對夜冷舖唔陌生,當年吉舖處處,但旺區就湧現一些短期租約的夜冷舖。舖頭內除了例牌見到本來運去歐美的聖誕裝飾產品,還有唔少因為代理、貿易公司執笠而出現的筍貨。例如當年何文田就有夜冷舖忽然有大批無印家品,除了小型家庭用品,更厲害係有唔少家具如茶几及床褥,據悉貨源來自當年無印撤出香港的剩餘物資,風聲傳開後,這批筍貨幾日就一掃而空。
不過隨著電商網店大趨勢,今次經濟衰退就唔見實體夜府店再湧現,取而代之係在二手拍賣App、賣物Group突襲散貨的賣家。近來見到最熱門的夜冷商品係超平名牌laptop,原價五、六千元散貨價二千鬆啲有交易,盒面就寫明企業專用版,賣家亦暗示貨源來自公司執笠賤賣生財工具,又或之前入落的貨品賣唔出唯有透過此途徑套現。假如你看到這類貨源越來越多,散貨價越來越殘,就可以解讀為中小企執笠潮已經爆發。
另一項夜冷指標係一張辦公椅,這款辦公椅就係Herman Miller 招牌貨Aeron Chair。這款Aeron Chair賣點係人體工學設計,據說坐足全日都唔會腿痠背痛,而且外型富科幻感,所以多年來一直係I.T.、Marketing及廣告企業不惜工本添置的辦公椅,即使唔係員工每人一張,至少都要在會議室選用Aeron Chair,讓訪客感受到公司的品味及實力。
正因為係熱門之選,所以每逢爆發執笠潮時,二手拍賣平台及專賣辦公室家具的夜冷店都會忽然湧現大批Aeron Chair貨源(上圖,其中一個app)。金融海嘯時就有唔少上班族以筍價執到Aeron Chair二手貨,搬回家中當home office坐椅。而近來二手交易平台確實多了Aeron Chair筍貨,似乎執笠潮已見瞄頭。
雖然夜冷貨好筍,不過大家都要警惕經濟衰退可能都會波及到自己。執平貨之餘切記要保留充裕現金,否則買入夜冷貨唔夠一個月,自己就要由買家變為賣家了。
===============
精選資訊網站「中環街市」 臉書粉絲頁