香港股市 已收市

從財演放假 看實力變化

踏入2019年港股未能扭轉濕滯格局開出黑盤,通常股市跌完又跌,財演節目反而會更受歡迎,皆因股民都更想知後市走向及點樣處理手上蟹貨。如果你都想搵財演指點迷津,就不妨留意一下財演實力的另類訊號。

先有幣少,再有大台姐仔老公被貼追數街招事件,提醒我們生活太奢華的「高人」其實未必靠得住。不過商業社會,有本事的人除非係無可救藥的工作狂,否則大時大節應該有條件與家人外遊又或休息幾日。所以每逢長假期,事先張揚會與家人去富貴地方外遊或留港消費的財演,其財力及實力理論上都可以加分。相反,長假期時都日日上各大媒體做節目的財演,又或不停在自家頻道亮相,雖然係勤力,但同時又釋出手停口停的訊號了

外國一線歌手、影星會自己開公司做老闆,但亦會與巨型娛樂集團簽約建立長期合作關係,證明樹大好遮陰的傳統智慧。同樣道理,財演在知名券商或大行有個銜頭,始終係信心保證。如果長期要在六、七線機構「掛單」,甚至係自僱方式行走江湖的「單體財演」,「實力值」就難免較輸蝕。

正所謂魚唔過塘唔肥,市旺時券商、大行樂於挖角,財演跳糟是等閒事。但現在港股又虛又弱,跳糟機會當然會大減。所以在逆市時財演仍可以跳糟,仲要係細行轉大行或大行轉大行,銜頭又毋須縮水甚至升格,「實力值」就可以加分。相反,有財演忽然由大行轉細行,銜頭又無乜變的話,視為「實力值」下降訊號亦合情合理吧。

===============

財經精選資訊短打網站「中環街市」  臉書粉絲頁