打呔就係見洋人日子 俱往矣！

.

前特首分享社運人士打呔出席美國聽證會，點評打晒呔一定係見洋人，此言令不少在商業區返工人士大吃一驚，皆因今時今日連金融界中人都少打呔。

但曾幾何時，在本地商場見洋人真係要執套靚suit打埋呔。

講的是上世紀六十年代直到前特首當打的八十年代，本地商業、金融生態圈由洋人作主導，60間上市公司當中，有40間是英資的，不少歐美洋人很著重行頭，你與他們開會傾生意，無打呔未開口就扣盡印象分。至於城中一些高級餐廳，唔打呔更是恕不招待，前特首在如此氛圍下為事業打拚，難怪會有打呔就係見洋人的印象。

即使當年隔個大洋的美國，連剛崛起的矽谷，科技巨企的掌舵人都甩唔開打呔見人傳統。例如蘋果教主，他留給人形象係黑衫配牛仔褲加波鞋，但他前半生其實出名著名牌西裝以帥哥形象見人，可見當年不論歐美，洋人見洋人都需要打返條呔。

不過時移世易，今時今日夏天熱得死人，冬天又縮剩幾日，氣氛暖化迫使大家都唔想打呔，由工商業到金融業，不少人都係日日著恤衫西褲返工見客就算，甚至有些科技企業，連管理層都係著短褲涼鞋返工，你打呔反而會成為異類。今時今日打晒呔未必係見洋人，反而好大機會，係保險經紀見內地客。

（網傳片段：李嘉誠當年打晒呔見鄧小平）

咁到底前特首講「見洋人」骨子裡是什麼意思呢？可能是想說那些常被指「搞亂」中國的人，例如索羅斯又或者特朗普，君不見每次兩人出席公開場合，都一定係打晒呔正裝視人？尤其係特朗普條大紅呔更加係深入民心。

最近索羅斯發表評論指擔憂特朗普會放生華為，還說「打敗當下中國的興趣，超過了對美國的國家利益的關心」，引起親中陣營關注，可能因為咁，前特首將索羅斯的形象投射到聽證會去，覺得金融大鱷總是會著西裝打呔的，反中亂港的總係打晒呔。

.

但事實上，打呔只係商場禮儀文化一種，內地商場除非土豪大老闆大可唔打，中小企電商老闆聚頭開會時，反而多人打呔，這些筆者都瀝瀝在目；今時今日，反問香港職場仲有幾多場合，經常見洋人要打呔呢？

香港打呔見洋人的時代早已不復再，如今依習總說法是要「搞起」中國，用得呢個字，肯定唔會係西裝打呔，而係農民子弟兵style了。

===============

精選資訊網站「中環街市」 臉書粉絲頁