【扮工收風】地盤工寄CV去event team
世事無奇不有,搵工的世界,無定律呢回事。朋友公司出晒名忙到甩轆的Event team,最近走咗唔少人,個個都有好路數,於是上司急住請人,可惜收極CV都唔啱。
千祈唔好以為係上司奄尖,上司並唔係嫌求職者價高、亦唔係覺得求職者經驗唔夠,而係根本無一個人揀得落手。佢細數手上收到的CV,真係聽到都嚇一跳。
朋友話,最經典的一份CV,係來自一名地盤工人。申請職位寫明係Event team的senior officer,但工作經驗只得幾行字,就係「平水工、焊接、木模板工、批盪、鋪瓦」。
莫非佢以為Event Team就係要負責搭個枱出來搞Event?
其他CV都唔輸蝕,包括有兩年無做嘢的全職媽媽,對上一份工係做大學秘書,幫老闆mark 工作行程,就當自己識搞event。
仲有擁有超市理貨經驗的理貨員,話自己有「搬運及管理」經驗,希望呢個經驗可以在新崗位大派用場。
上司忍唔住逐份CV show畀同事睇,最後仲吩咐同事私下幫手搵「正常人」apply,平衡一下心理咁話喎。
但話說回頭,如果地盤工係彭于晏咁嘅樣,就唔同講法喇!
19+精選推介
秒like 19+ Facebook!
===================
19網輕鬆爆料熱線,歡迎舉報老細同事19惡行,立即click入去講畀我哋知啦