【扮工收風】見工筆試交白卷 畢業生的解釋是⋯
返學交白卷呢回事,小編小學、初中及高中都試過零零星星幾次,之但係讀完大學畢業後入社會工作,就未試過面試交白卷。最近有朋友想請大學畢業生做一些junior post,但一直都揀唔落手,仲見到有求職者筆試「交白卷」,真係心都離一離。
於是朋友緊係走上前問點解啦,點知呢位畢業生嘅回答竟然係:
「你部電腦冇九方,我唔識打,我剩係識九方。」
咁點解你唔出聲?
「因為我打咗落手機Whatsapp度,可以Forward畀你,可以嗎?」
吓?我筆試考埋你格式喎,Whatsapp得一堆字,無格式可言㗎喎。
朋友聽到個心離一離,最後都決定當呢位求職者交白卷處理。事後朋友分享畀其他同事聽,有人就認為呢位求職者都叫有諗辦法解決問題,think out of the box,仲叫朋友睇開啲,學習適應同新世代合作,後生仔唔Buy倉頡啦。
所謂三年一代溝,朋友面對住呢種唔知幾多個溝的畢業生,真心讚唔落佢哋有創意囉!擺到明零創意,冇應變能力啦!
===================
19網輕鬆爆料熱線,歡迎舉報老細同事19惡行,立即click入去講畀我哋知啦