雅虎香港財經 【拉闊投資】搞生意嘅目標係……（小勇哥）
過去幾期文章，小勇講咗物業、債券、外幣同埋股票，喺財富組合入面嘅角色，但呢啲資產主要係為咗建立被動收入來源（股票計一半）。至於主動收入，除咗股票（都係計一半）之外，當然係打工或者做生意。小勇無打工10年，靠自己搞生意搵收入。我覺得最好嘅生意係上咗軌道形成一種模式之後，靠資金同埋員工已經可以賺到錢，自己嘅角色只係出資同埋決策，將生意變成被動收入來源之一。
發展成熟後 變被動收入
不過，呢樣嘢知易行難，始終要時間建立，所以最近呢5年，小勇都係學習做生意，曾經搵咗不同嘅專業人士拍檔，同時發展三種業務，但經過一輪試錯後，加上呢兩年經濟轉弱，有兩瓣生意已拆夥，現在只留下一瓣較有前途嘅生意，希望經過一輪發展後，可以變成被動收入，但係現在主要靠自己，仍停留喺主動收入。
小勇已經踏入人生下半場，但仍然想主動做嘢搵achievement，即使將來被動收入持續增加，亦唔想唔做嘢，最多將主動收入降到好低或者捐咗去。不過，現在香港營商環境差，做生意要採守勢。小勇前年開始將營運成本逐步降低，現在寒冬殺到，以輕成本應對，相信可穩住盤生意。
除此之外，digitalize已經係每間公司未來嘅出路，小勇亦計劃趁住低潮發掘呢方面嘅機會。最重要嘅係digitalization可以scale up盤生意，係比較容易將生意變成被動收入。
生意淡薄但小勇唔會想不如賭博。我會趁呢個時候，投入多點時間喺家人、運動同埋進修，因為家庭、健康同埋知識係人生最大嘅財富，任何時候都應該用心用力投入資源，我堅信回報唔係金錢可以量度到嘅！
小勇哥
Yahoo Money Talk客席主持、投資達人
本欄逢周四刊出
