雅虎香港財經 操盤手札記│《繁花》折射 槓桿all-in會輸死（割柑人）
「我地板也摔過了，天花板我也見到過了。」呢句嚟自近期熱播、由香港導演王家衛執導嘅中國電視劇《繁花》結局嘅對白，聽在港股投資者耳裏，不無唏噓！恒指連跌4年後，今年以嚟14個交易日12日報跌，累跌1,738點或10.2%，上周四低見15183，觸及上年1月以嚟嘅下降通道底後反彈，可惜彈一日就散，上周五收15308。地球另一邊嘅美股，上周五道指升1.1%至37863、標指升1.2%至4839、納指升1.7%至15310；道指、標指齊創歷史新高，納指則首度升越恒指，以2點差距跑贏一個馬鼻！回想2019年7月，恒指仍然高過道指，前者喺28500水平，後者喺27100水平，納指只喺8200水平，之後只餘唏噓！
美股外幣即時報價 多國新聞任睇
利用資金優勢 大戶收割散戶
《繁花》係一部以80年代尾90年代初上海喺改革開放初期資本市場跌宕為背景嘅劇集，涵蓋股市發展歷程——西康路101號獲批（上海證券交易所喺1990年尾成立前，有段長達5年嘅櫃檯交易歷史，西康路101號即中國工商銀行上海信託投資公司靜安證券交易部，被視為改革開放後中國證券市場嘅起點）、上海證券交易所開業、首批8隻股票掛牌、股票認購證出現（4個月後升值160倍）等。該劇首集有句對白：「同樣以100點為起點，差不多有100年歷史的美國道瓊斯指數到今天才不過3300點，剛滿1歲的上證指數已經接近1000點。」相對現時前者報37863，後者報2832，又係不無唏噓！
該劇故事對投資者頗具啟示，例如：
①如何面對股票波動——主角阿寶初試啼聲，聽師傅爺叔之言買入「電真空」，不出一周股價斬半，爺叔意味深長咁話：「紐約的帝國大廈，從底下跑到屋頂要1個鐘頭，從屋頂跳下來只要8.8秒，這就是股票，想從股票上賺錢，先要學會輸。」
②槓桿all-in單一股票隨時輸死——阿寶股友發根收到內幕消息，全副身家連帶親友嘅錢買入414號股票，結果股價大跌，受唔住打擊猝死。
③大戶如何收割散戶——阿寶成為「上海服飾公司」上市顧問，被機構「南國投」狙擊，對方利用資金優勢，以極高開市價誘散戶高追，然後逐步派貨，讓股價震盪，再使出即日沽空回補策略「扶老太太下樓梯」。
港股估值似平 小心價值陷阱
劇中提到嘅股票，「電真空」原型係「真空電子」，係中國將國有大型中型企業改成股份制嘅首個案例，亦係滬市「老八股」之一（現為雲賽智聯，600602）；414號股票原型係「老八股」中唯一嘅外地股票「浙江鳳凰」（已除牌）；601號股票原型係「老八股」之一嘅「延中實業」，1993年深圳寶安集團披露持有延中普通股逾5%，打響中國上市公司收購／反收購第一槍（現為方正科技，600601）；「上海服飾公司」原型係「上海時裝公司」（現為新華傳媒，600825）。
言歸正傳，講返港股，究竟跌夠未？值得入市未？睇走勢圖，恒指喺下降通道底15200水平暫見支持，如果失守，料將下試「疫情底」2022年10月尾低位14597；如果反彈，則先上望前底16000水平。恒指跌至現水平，預測市盈率8.2倍、市帳率0.9倍、股息率4.7厘 ，估值似乎便宜，但前提係企業盈利要能維持，不能減少，否則估值將變昂貴，小心價值陷阱！
本欄隔周一刊出
