雅虎香港財經 操盤手札記│港股反彈急 有修正風險（割柑人）
2023年伊始，港股係威係勢，上周開局，4個交易日中連升3日，到上周五始回吐，全周累升1,210點或6.1%。回顧2022年，本港股樓齊（哀）鳴，恒生指數埋單跌15.5%，中原樓價指數跌15.1%；打工仔最切身嘅強積金，平均回報亦跌15.5%，平均每人蝕40,100元，以每月供款1,500元計，就白供26個月有凸，打工仔變「白供群英」。本月22日就係農曆新年，歲次癸卯，肖兔，希望今年「兔」氣揚眉啦！
美股外幣即時報價 多國新聞任睇
港股上年最差係10月尾，年初起計累跌37.6%，11月同12月爭氣先冇咁傷，當時炒上係炒美國加息步伐放慢，以及中港通關。美國上月中開始放慢加息步伐，中國則喺昨日開始開關。不過，就算美國通脹見頂，但睇12月就業數據仍然強勁，聯儲局官員爭相表示必須繼續加息遏制通脹，市場預咗雖然加息步伐放慢，但加息周期延長。中國開關亦喜憂參半，市場擔心會令疫情惡化。
馬雲棄螞蟻控權 鋪路上市
上周五，美國公布12月非農新增職位22.3萬個，多過預期；失業率跌至3.5%，低過預期。值得注意嘅係，平均時薪按年、按月升幅分別收窄至4.6%、0.3%，低過預期，反映通脹壓力減輕，加息步伐或進一步放慢。消息刺激美股急升，三大指數收升2.1%至2.6%；港股ADR比例指數高水363點或1.7%，阿里巴巴（9988）美股更較港股高3.2%。螞蟻集團公布，阿里創辦人馬雲放棄螞蟻控制權，市場估計係為重新上市鋪路，阿里亦將受惠。
恒指上周五高開後倒跌，收20991，雖然守住上周四上升裂口，但已見「雙飛烏鴉」，若今日再高開後倒跌，就會形成「三飛烏鴉」利淡走勢。雖然恒指已喺上年10月尾見底，但由低位反彈過急，至上周高位已反彈6,798點或46.6%，有修正嘅風險。恒指已升穿保歷加通道頂，14天RSI亦已升穿70超買區，本周或繼續技術調整，初步支持睇250天牛熊線20350，重要支持睇20天線19750，過去兩個月，20天線都係回調支持位；完成整固後，有望挑戰上年6月高位22450。
友邦借消息回吐 可博反彈
美國加息、中國開關，有冇股票食盡兩條水？不妨喺國際金融股中尋寶，一來，加息有助息差擴闊，利好盈利增長；二來，筆者喺聖誕前嘅文章都提過，中港通關，保險商、銀行亦將受惠，因香港金融產品對内地遊客具吸引力。國際金融股中，滙豐控股（005）上周連升4日，連開3個上升裂口，上周五收52.2元，升1.9%；美國ADR折算收53.57港元，較港高2.6%。不過，該股升勢過急，裂口過多，不宜高追。
另一隻友邦保險（1299），上年臨尾兩個月反彈五成，上周四始因旗下友邦人壽被中國銀保監指償付能力數據不實而出現較似樣嘅回吐；友邦人壽回應，事件涉及公司上年第一、二季償付能力數據嘅計算差錯，公司已於上年第三季完成整改。友邦上周五收88.2元，跌1%，兩日累跌3.4%，下試上年10月尾以嚟嘅上升軌；美國ADR折算收90.03港元，較港高2.1%。該股守喺上升軌之上可小注博反彈，但要嚴守止蝕。
割柑人
www.fb.com/hkstockpicker
本欄逢周一刊出
