雅虎香港財經 操盤手札記│績優股冷吼國泰（割柑人）
火花四濺！上周三，美國總統拜登簽行政令，禁止美國資本投資中國敏感科技，包括半導體、量子運算、人工智能，禁令涵蓋香港、澳門；中國商務部回應，將保留採取措施權利。上周四，拜登指中國經濟「面臨麻煩」，係「計時炸彈」，又指「當壞人遇到問題時會做壞事」；中國官媒《新華社》發文駁斥，稱「唱衰中國，只會在事實面前反覆碰壁」。明年美國總統選舉，中國議題勢成選戰主軸，科技股難免再成磨心，小心！
美股外幣即時報價 多國新聞任睇
中美罕合作 增往返航班
美國應對中國，雖然喺科技範疇以「國家安全」為由「選擇性脫鈎」，但其他範疇並未斷鏈。上周五，雙方出現罕見合作，美國交通部宣布，9月1日起，批准前往美國嘅中國客運航班，由每周12班增至18班；10月29日起，再增至24班。據《路透社》報道，中國亦同意等量增加前往中國嘅美國航班，意味中美往返航班喺10月底會翻倍至每周48班。時值中國上周四公布恢復出境旅行團第三批名單，包括美、英、澳、日、韓等78國。
政治爭拗對市場嚟講只係噪音，睇經濟數據更實際。上周五，美國公布嘅7月PPI數據高過預期，市場對聯儲局今年內減息嘅預期降溫，美滙指數上升，收102.85；但焦點落喺日圓，日圓兌每美元繼上日由即市升0.3%變收市跌0.7%，震幅達1%後，是日更觸及上年9月日本央行干預日圓嘅145水平，低見145.05，收144.96，市場觀望日本央行本周會否再干預滙市。美股道指升0.3%，標指跌0.1%，納指跌0.7%；金龍中國指數跌3.7%；港股ADR比例指數低水233點或1.2%。
筆者喺2020年8月寫過一篇文，關於兩間以3.88元上市嘅公司，嗰兩間公司，港府都係股東，但股價表現差天共地！係邊兩間？就係港交所（388）同國泰航空（293）。話說3年前嘅8月6日，港交所股價高見388元，創歷史新高，係2000年6月27日以介紹形式上市時股價3.88元嘅100倍！反觀國泰，受疫情影響而供股、盈警，股價折翼急墮。國泰1946年成立；1986年，40周年，以3.88元招股上市，超額認購55倍破紀錄，5月15日掛牌，6月晉身藍籌；2017年，被剔出藍籌。
盈利能力高 惟未有派息
時移勢易，隨着疫情減退，防疫措施鬆綁，各地恢復通關，國泰再度展翅。上周三，國泰公布上半年業績，終於扭虧為盈，賺42.68億元（上年同期蝕49.99億元）；計劃年底前贖回及註銷一半港府所持優先股，下年7月底前全數贖回。值得注意嘅係，撇除優先股部分，上半年普通股股東應佔溢利為39.59億元（上年同期蝕52.99億元），好過2016年至2022年各年全年表現。以溢利率計，上半年達9.1%，僅次於2010年嘅15.7%，國泰2010年業績係歷來最好一年。
由於北半球航空旺季喺下半年，國泰下半年業績通常好過上半年；加上中國放寛出境團、中美增加往返航班，國泰亦有營運中美航班，雖然係非直航（第五航權），票價較直航平，而且要同內地航空公司競爭，但亦有望分羹。不過，要注意係，港府所持優先股本月滿3年，按協議，利息將由3厘升至5厘，國泰勢以贖回優先股為首務，派發普通股股息只係其次。事實上，國泰亦表明，未有恢復派發普通股股息時間表。雖然國泰溢利率顯示盈利能力僅次於歷來之最2010年，但未有股息，績優股中，屬冷吼之選。
割柑人
本欄隔周一刊出
