雅虎香港財經 智取大市｜疑套取1億美國人秘密數據 拼多多引發中美大戰？｜晉佳
沽空機構Grizzly Research拋出一個震撼彈，有別於過往嘅沽空報告踢爆造假，Grizzly今次矛頭直指拼多多（PDD），指控其主攻海外嘅人氣電商App Temu，有涉嫌入侵上億美國用戶嘅手機竊取個人資料、行踪並傳送至大陸嘅風險。
呢份報告嘅最重要部份，係搵咗多位手機應用程式專家（冇講幾多位），列出18面紅旗嘅列表，將Temu同eBay、Amazon、TikTok、SHEIN、阿里巴巴比較，結果Temu 18面紅旗全中，而當中有4面紅旗，只得Temu「獨家專享」，而呢4面紅旗，似乎係正常碰不得嘅4個網絡安全隱患，而4個隱患加起上嚟，更加係威力無窮，呢一個重點，能夠列出嘅傳媒並不多。
首先，Temu嘅程式能夠喺執行期間啟動另外一個應用程式，潛在風險在於能夠向手機注入惡意指令進行攻擊。
第二，可以透過程式獲取系統日誌（system logs），由於系統日誌藏有用戶名稱、個人密碼、個人數據、私人訊息及應用程式活動等等，盗用日誌亦可以破壞系統穩定性及安全性。
第三，Temu有權限安裝其他應用程式。普通應用程式通常毋須呢個權限，除非係App Store之類，你可以透過App Store去裝其他應用程式。
第四，Temu可以將MAC地址（Media Access Control）傳送到另一個server，可以追踪手機地理位置及用戶行為，達到監控效果。
Grizzly引述專家講到，從未見過一個有5,000萬用戶以上嘅App，會觸及上述安全隱患，甚至會有能力獲取用戶嘅圖片及私人文件，亦有風險將數據提供中國政府。報告亦指出，為咗獲取以上嘅「能力」，Temu以本傷人地以Amazon貨品半價去換取用戶數據，目的不言而喻。
之所以話係震撼彈，係因為Temu喺美國嘅下載量超過1億，換言之，美國接近三分之一人口嘅個人資訊同行踪可能已落入Temu手中！可能相當於近一半美國成年人口，威脅相當大，然後呢啲秘密資料傳送去邊度？唔需要多講了。
如果事件被確認屬實，歐美之後會點樣反應？圍堵行動根本停唔到落嚟？至少未來新嘅中國企業要透過網絡世界進軍歐美，似乎難上加難，拼多多正式將中企未來進軍歐美嘅橋樑一口氣切斷，而拼多多股價下跌趨勢唔似咁快能夠完結。
華為那邊為咗突破樽頸，以中芯代工嘅7nm製程晶片，嘗試對抗蘋果iPhone，但努力興建同時拼多多盡情破壞。去到2024年、2025年，中俄伊朝鮮同歐美日韓菲嘅矛盾點樣惡化，以至影響市場，絕對係長線最重要嘅篇章。
https://www.facebook.com/advanceguy1
註：專欄作家言論不代表本網立場
