雅虎香港財經 笑到最後｜東升西升 此刻無價（高明）
年初至今，美股標普上升7.1%，納指上升6.3%，恒指上升3.2%，日股用日圓去計算升13.8%，美元計價只係升3.3%。淨係計一星期恒指升1427點或8.8%，姑勿論之前表現點，只計算今個星期表現，已經好值得一批人士歡呼喝采。
美股外幣即時報價 多國新聞任睇
有錢齊齊搵
以往投資界最希望見到嘅事，就係「東升西升」， 東係指由美國東岸紐約嘅交易所開始計東邊，一直去到最西邊巴西、格陸蘭等。以前美股東升，創造一系列新嘅概念出嚟炒，然後喺紐約以西嘅市場，例如香港，就可以針對美股當炒概念，大企業就分拆相關企業，中企業就自行孵化新嘅創投，莊家就啤殼，總之有錢齊齊搵，就係咁簡單。
環球股市齊做好 投資者樂見
今次「東升西升」絕不簡單，有「人間地獄」之稱嘅英國，國家指數富時100，年初至今用英鎊計算到升5.4%，其他更加落後嘅法國德國等等都分別升7.4%、8.6%，甚至打緊仗嘅莫斯科指數，都成11.4%。唔炒股票，定期收息買債之類，一樣受惠約5厘息回報。其他加密貨幣更加唔需要多講。
投資世界，正常都會望「東升西升」， 因為只係一個好簡單嘅道理，上升嘅倍數，最盡可以係無限，下跌最多只係100%。
就以最近受到美帝媒體抹黑嘅Tesla（TSLA）為例，出業績前近乎歇斯底里， 作埋唔出Model 2嘅新聞都要推低股價，但主動權始終喺馬斯克手上，佢業績只係話會出平價版Model 2，就已粉碎流言，股價績後反彈，隨後Alphabet（GOOGL）績後又升，兩隻科技七巨頭升，整個美股就扭轉悲觀情緒，連減息轉加息嘅隱憂都唔理。
當然，網上世界好易吸引一啲鍵盤智者，自稱Put咗好勁，但正如上面嘅永恒公式，賣空，例如賣中Tesla執笠，最多只可賺100%；但買升，過去嘅升幅其實已經足以說明，升幅可以無止境。
2024年高息年，去年底已經預先透支憧憬減息預期，年初期望唔算太高，走到今日竟然「東升西升」，如果持續至年底，今年恐怕所有投資者都賺錢，值得預先慶賀。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
