雅虎香港財經 《流行經典50年》蔣家旻傅嘉莉獻唱《戀愛大過天》被彈：佢哋都係拍戲算啦
無綫劇集《反黑路人甲》正在熱播中，口碑及收視都唔錯。最新一集《流行經典50年》就邀請咗一班劇中演員做嘉賓，有王浩信、張振朗、蔣家旻及傅嘉莉等等，佢哋分別為節目獻唱多首歌曲。蔣家旻同傅嘉莉係從來冇公開表演過唱歌，今次就為節目獻出第一次，蔣家旻更喺事前專登搵咗歌唱老師上堂惡補，務求盡力做到最好。
今次佢哋合唱嘅歌曲係Twins嘅《戀愛大過天》，難度唔算太高。蔣家旻可能太緊張嘅關係，喺表演中未有放膽去唱，搞到唔夠氣兼走音， 而傅嘉莉雖然比較放鬆，但一直徘徊喺走音邊緣，結果佢哋被網友形容為災難現場，完全毀咗成首歌，有網民仲話：「嘩 走音走到咁 本身唔鐘意twins都寧願聽番原唱」、「佢哋都係拍戲算啦」、「終於有人差得過twins」及「竟然有人可以唱得難聽過原唱」等等，不過都有唔少網民留言叫佢加油同讚佢哋好勇敢踏出第一步。
節目出街後，蔣家旻喺社交網站話自己唔討厭唱歌，不過就對唱歌有恐懼，寧願熬夜拍劇或跳舞跳得筋疲力盡，但近排佢好想勇敢面對及克服呢個弱項。佢明知自己狀態唔算好，但都鼓起勇氣去唱「值得為自己的勇氣鼓掌」。而傳嘉莉就話希望吸收今次經驗，下次表現得更加好！佢哋兩個始終唔係歌手，首次唱歌表演嚟講都算唔錯。
