雅虎香港財經 為囡囡拒絕復出拍劇 重溫郭可盈經典劇集角色
郭可盈喺93年參選港姐，可惜三甲不入，之後簽約無綫成為藝人，過往曾經主演過好多唔同類型嘅電視劇。04年與林文龍結婚，10年誕下一女後，就將所有心機投放家庭上，做個好太太兼好媽媽。早前出席公開活動嘅時候，佢揚言唔會復出拍劇。相信大家應該好掛住佢嘅演出，不如我哋一齊回顧吓郭可盈當年嘅經典角色！
《刑事偵緝檔案》系列 飾演 高婕（1995年）
靚女記者高婕Jessie（郭可盈飾）同未婚夫江宇軒（陳啟泰飾）感情美滿，因為張大勇（陶大宇飾）嘅出現令宇軒呷醋，但Jessie並無放上心。宇軒更因為咁，結果出軌，最後Jessie同大勇有情人終成眷屬。演出自然嘅郭可盈更憑「高婕」一角人氣急升。
《Ｏ記實錄》飾演 伍頌蓮（1995年）
當時只有26歲嘅郭可盈劇中飾演一位嫁入豪門的已婚婦人，但佢嘅婚姻生活並不如意，遭到丈夫冷待。但遇上舊同學O記探員王志淙（黃日華飾），倆人因為互相扶持，日久生情。
《闔府統請》飾演 文雅詠（1996年）
文雅詠（郭可盈飾）係一位著名新聞女主播，可以話係美貌與智慧並重，深受愛戴。
《創世紀》飾演 岑穎欣（1999年）
郭可盈喺劇中飾演嘅岑穎係個絕世好女友，佢孝順、善良又節儉。周旋葉榮添（羅家良飾）與許文彪（陳錦鴻飾演）之間，更譜出一段三角苦戀。穎欣最後選擇跟文彪一齊，就算後來對方變得奸險邪惡，都不離不棄，深愛著對方。
《創世紀II天地有情》飾演 高美娜（2000年）
《創世紀》岑穎欣嘅孖生妹妹，葉榮添因為睇中美娜嘅樣貌而且被吸引住。結果張自力（古天樂飾）為咗想對付葉榮添就收賣美娜去對付佢。但日久真係會生情，當美娜知道姐姐穎欣嘅事後，竟對榮添產生咗情意。
《法網伊人》飾演 沈學儀（2002年）
沈學儀出生於法律世家，父母對佢有好大期望，但其實佢並無事業野心，只想過一些自由自在的生活。郭可盈首次飾演一個師奶仔，甚至劇中嘅花名都叫阿沈（阿嬸），佢仲憑角色獲得「本年度我最喜愛電視角色」獎項。
《青出於藍》飾演 王若詩（2004年）
郭可盈今次飾演女教師Miss Wong，除咗係一個受學生歡迎嘅老師之外，仲連男老師都好鍾意佢。劇中與陶大宇飾演嘅曾Sir及歐陽震華飾演嘅賈校長譜出三角戀，最後Miss Wong都係選擇同曾Sir一齊。雖然劇情離不開感情三角關係，不過主題曲《開學禮》「同學各位找個位，這是你的開學禮⋯⋯」更成為而家好多學生九月開學第一日會哼嘅歌添！佢仲憑Miss Wong呢個角色獲得「本年度我最喜愛電視角色」獎項。
《酒店風雲》飾演 顧碧琦（2005年）
高峰（馬德鐘飾）高大靚仔，有個性，配襯樣靚加有慧根嘅顧碧琦（郭可盈飾）真係朗才女貌！但係二人感情受到重重考驗，份外艱難，更加令到呢份愛情變得彌足珍貴。劇情到最後高峰同碧琦倆人牢牢相擁，令人有種險處逢生又溫暖嘅感覺，令人感動！
《施公奇案》飾演 米香蓉（2006年）
講到可盈最佳男拍檔，真係非陶大宇加歐陽震華莫屬，好似產生化學反應咁，令人期待，當中最經典一定係《施公奇案》。施世綸（歐陽震華飾）一次查案中幫助香蓉，為保香蓉名節決心娶做四姨太，但婚後倆人火星撞地球一樣，成為一對歡喜冤家。
《富貴門》飾演 董令姿（2009年）
《富貴門》係郭可盈最後一部參演嘅無綫劇集，由佢飾演董令姿喺大學畢業後成為見習律師，遇上已有未婚妻、從小認識嘅哥哥（呂良偉飾），但哥哥決心選擇未婚妻，令到令姿非常傷心，從此變得好有佔有慾。感情路失敗，爸爸同時遇害身亡，對令姿嚟講，愛係一切推動力，事業、感情，人生一樣。
