香港股市 已收市

【熱話】電梯學徒人工低:「看更都睇我哋唔起!」

打開新聞,電梯意外無日無之。鬼咩,原來人工低到冇人想入行,人手唔夠自然無人維修,惡性循環下一定出事。

有電梯學徒勁不滿,自覺被壓榨,所以忍唔住上討論區訴苦,仲一次過數晒唔同電梯公司學徒嘅人工。最低月薪$9000,最高人工有$13000,但就做到你死吓死吓。有學徒甚至形容:「整電梯嗰時連看更都睇我哋唔起,轉行做看更好過!」 

以下係綜合行內人形容電梯學徒被剝削嘅慘況,一眾打工仔不妨評吓理: 

1) 公司間間價錢都唔同,大部分電梯公司應該得九千至一萬。

2)辛唔辛苦要睇你跟咩師傅,返工時間星期一至六,有啲返八點半收五點半,有啲返九點收六點。 

3)如果你入電梯行,晉升機會低,要做夠四年先可以做師傅,而且師傅的價錢只係多電梯學徒幾千蚊,有師傅做左十幾年,月薪連2萬都無。

4)政府實行六一八條例之後要拎牌,如果發生事故分分鐘要上身,拎牌根本就係一種責任,唔係真愛都唔好做呀。

5)做完電梯出嚟好難搵到其他工做,習慣咗就好難轉行。

6)呢行好辛苦,電梯分好多種,有啲路軌用滑輪(行內叫飛機轆),有啲用滑動導靴(行內叫雞蘇),呢種路軌好唔環保,因為要落油去保持電梯的流暢,但落油的𨋢底係好恐怖,好污糟。 

7)夏天機房又熱又無冷氣,無冷氣的機房通常用抽氣扇,但抽氣扇會帶起好多塵,分分鐘要做埋清潔。

8)如果你做維修保養乜都要你包,分分鐘仲辛苦過洗碗,但人工低過洗碗,所以無乜人入行。 

睇到呢度,我只可以講句,以後見到電梯維修工,一定唔會吝嗇一句加油,因為冇咗佢哋,我哋打工仔返工放工又點可能咁方便吖!致敬! 

來源:香討

===================

19網輕鬆爆料熱線,歡迎舉報老細同事19惡行,立即click入去講畀我哋知啦