雅虎香港財經 爆一爆｜兩餸飯爭食 大快活做$50生意賺得7毫子（Louise）
香港飲食業界受到「北上消費風暴」所摧殘已經是不爭的事實。
大快活長情股東吐苦水
昨日致電一位老友吹水，佢揸住大快活（0052.HK） 股票逾20年，剛剛上週公佈業績，牙痛咁聲同小妹呻：「香港飲食業真係好大鑊，大快活做30億生意，賺得嗰5,000萬，當你一個餐50蚊，即係做50生意，先賺到7毫幾子咋。」 呢位老友以前身有公職嘅關係，不能沾手其他公用事業及地產股票，於是就選了民生食肆大快活來作長線投資，沙士之後大快活股價長升長有，曾經是散戶及基金愛股，就好似呢位老友咁，既是大快活嘅食客又係股東，入去幫趁當係股東巡視業務。
呢位經常出外吃飯老友，早就察覺到過去兩年遍地開花嘅兩餸飯，就係睇住連鎖快餐店來打。「關鍵係呢幾年，兩餸飯攞到平租金，開到去中、上環都有，兩餸飯仲要係地舖喎，大快活係冇地鋪㗎，人哋隔住個玻璃一目了然睇到有咩餸菜，係快餐店真係要遞到出嚟先知碟飯餸乜料。」事實上，兩餸飯做外賣省卻堂食成本開支，起碼做到「價廉」，「物美」就唔知。但在消費降級之大環境下，這才是生存之道。
乜都唔做收息2,800萬
小妹即管翻開大快活業績睇下，最吊詭嘅係公司揸住6.4億cash，去年單係利息收益，已經有2,800萬，相等於盈利一半，咁睇法，使鬼咁辛苦搞百幾間快餐咩？坐住收息唔使咁痛苦喇。唔怪之得「牛角」老細黃傑龍寧願執笠保住啲子彈。不過我哋呢啲都係噏嘅啫，作為一間上市公司都有其社會責任，乾脆執埋佢等於打爛好多員工嘅飯碗，點都要掙扎求存撐下去。
再咀嚼大快活業績公佈入面的內容字眼，更加感受到飲食業的水深火熱：「我們以低價提供一系列超值產品 ，以滿足精打細算的顧客。」 直接啲講，即係食客個個要鍊住個荷包，公布內亦有提到市場「餐廳過剩」的問題，所以可以預期陸續有食肆要執笠被淘汰。
而小妹呢位老友就是經常巡視大快活業務來醫肚，最大鑊喺「食出感情」來， 2016年大快活股價攀上近$40高位，宜家得$7.75，揸到今日收幾多息都補唔返。 老友笑說：「食嘢可以有感情，但對股票真係唔好有感情呀！」
