異動尋寶│滯脹揀藥股打防守(魏力)
大股無勢,中細股多伏,指數無間上落市,6月開局一個多星期,彷似5月上旬的翻版,暫時動不如靜,留子彈月中後再買貨,原因上周五另文已分析,不贅,有興趣去小弟fb睇番。
美股、外匯、加密貨幣免費即時報價,自選投資組合獲取相關新聞提示。
美國非農連續兩個月差過預期,反映復蘇不似預期,但通脹卻是來勢洶洶,周三將公佈5月美國通脹數據,4%以上已成共識,有分析更估年內隨時見6%,但GDP何來6%增長?這就是魏力過去1個多月不斷說的滯脹。百物騰貴,但打工仔無人工加不特止,仲可能要減人工/做生意搵少咗,慘過通縮。
商品工業股要小心
美林投資鐘教你,滯脹要揸現金,頂多輸通脹,但炒嘢仲易輸。真係要買,都要揀防守股/逆周期股,消費股在滯脹初期會受惠加價,毛利率提升,但中段之後,上游原材料價大升,生產成本加加加,經濟又唔好,唔能夠大幅加價,只能自己硬食,咁就賺少咗。再講,疫情令供應鏈緊張,想增產都無能為力,銷量上唔到,加價都補唔番,業績自然出事。商品股、工業股要開始小心,咪以為一句加價就無事,現階段相關股宜減不宜加了。
另一類防守股係醫藥股,生老病死必然要面對,受經濟周期影響不大,原料價升當然都有影響,但以B仔股為例,本身都無收入盈利,股價升跌係睇新藥研發進度。當然,如其他板塊大跌,藥股估值一樣會下調,但要跌都後段先跌,起碼有時間睇定再走鬼。識揀當然揀龍頭如藥明(2269)、信達生物(1801),如想大包圍,華夏恒生生科(3069)都是不錯選擇。
魏力
筆者為證監會持牌人,未持有上述股份財務權益。
www.instagram.com/ngailik.stocks/
本欄逢周三刊出