【移民澳洲】澳洲換車牌買車入門教學

·4 分鐘文章

留學澳洲都會諗買車,更何況移居當地。想用香港牌在當地揸車,就要了解唔同地區的要求。

三至六個月寬限期

澳洲車牌制度分L學牌、P1紅P牌、P2綠P牌,掛綠P牌兩年後才可以轉正式車牌。至於路試相對香港唔算容易,曾有印度職業貨車司機考牌18次都失敗提出訴訟,指考官因為種族歧視而留難他,都曲線反映澳洲考牌有一定難度。既然考車牌難度相若,就倒不如在香港考牌領取換澳洲牌入場券並跳過澳洲車牌階梯。

拎住香港車牌到澳洲有兩大優勢,一是可以先用香港牌在當地揸車,另外可以將香港牌換成澳洲牌。首都領地(ACT)、北領地(NT)、昆士蘭(QLD)、南澳(SA)、塔斯曼尼亞(TAS)、西澳(WA)均可以用香港牌揸車三個月,而維多利亞(VIC)用香港牌更可以揸足半年。

假如你以技術移民簽證或配偶簽證等簽證長居澳洲,就要在三個月或六個月寬限期內將香港牌轉為澳洲牌。轉牌除了要有香港牌,最好提交埋運輸署發出的「駕駛執照細節證明」,以證明你的車牌是在香港考取及真正的駕駛年資。但要換牌設有兩項重要條件,一是你持有香港牌逾12個月,二是年齡在25歲以上。不符條件的話,你就要重新考筆試路試考取澳洲車牌了。由於香港並非塔斯曼尼亞認可地區,換言之你移居當地,就必須重新考牌。

部分州份會要求你同時出示香港車牌及國際牌,否則都當作違法揸車。所以即使有三個月或半年寬限期,你出發前最好在香港申請埋國際牌,反正只需要80港元而且到運輸署辦理可以即日批出。

買二手車考耐性

自駕代步當然要有車,初到埗唔少人會選擇先買二手車,澳洲買二手車相當普遍,甚至部分地區有時會出現二手盤源不足情況。在澳洲買二手車,最受歡迎的網上平台係Carsales,由於澳洲地方大,過來人教路最好加入自己地區,方便搜尋周邊範圍車盤。

另外過來人教路想篩選出可靠車盤,不妨衡量車主的耐性及了解汽車的過去。有誠意放車的自用車主,通常都樂意耐心答買家幾時買、汽車毛病、幾時睇車、車價包括甚麼等問題,所以你亦要有心理準備用Whatsapp或者與車主直接用電話溝通。

至於了解架車過去,除了透過放車平台的額外資料服務(如Carsales的FACT+),你亦可以車牌號碼查閱汽車的VIN/Chassis Number,再以VIN/Chassis Number到政府的PPSR付2澳元做汽車背景調查,了解汽車之前有否涉及事故、釘牌、未清罰款及供款等問題。不過網上車盤通常都遮著車牌,所以要直接問車主索取顯示車牌的汽車相片,假如車主拒絕亦反映他可能有點心虛。

與車主傾好,睇車時除了check車,亦要索取30天內有效的上路安全證書(Roadworthy Certificate, RWC),另外亦要確保汽車牌照(Rego)仍有效。付款予賣家後14天內,你要攜同賣家簽好的轉讓書(Transfer of Registration Form)到汽車登記處辦理轉讓及支付登記費及印花稅。

汽車牌費Rego已包括對事故人命傷亡賠償的強制保險,但因為保車不保人,所以需要另外購買保車的第三者保險(Third Party Property Insurance),想保埋火災偷竊損失,就不妨購買升級版第三者財產、火災及盜竊保險(Third Party, Fire and Theft Insurance)。保險會按車主年紀、駕駛年資、車價及車齡計算,不妨先搵齊AAMIQBENRMABudget Director四大車險公司報價再拍板。

伸延閱讀:

【移民英國】英國考車牌換車牌速成教學

【移民澳洲】偏遠地區技術移民簽證三大難關

【移民澳洲】留澳工作簽證延五年部署策略

【移民台灣】移民揸車入門教學(台灣篇)