雅虎香港財經 【移民英國】英國考車牌換車牌速成教學
移民外國不時會考慮在當地揸車，揸車最基本條件係要有牌，今次先介紹移民熱點英國轉牌考牌攻略。
攻頂級考試
唔少人會建議有意移居英國港人，最好決心先在香港考車牌，主要原因係香港車牌可以免試轉換成英國車牌。點解免試咁重要？皆因英國與法國、澳洲、德國並列世上最難考車牌國家，被譽為地上最難考的英國的士牌稱為「The Knowledge」，英國普通車牌考試亦講求知識與實戰並重。英國考車合格率長年徘徊四成幾，年前有保險公司調查發現，英國考車原來有「高分低能」現象，沒有GCSE學歷考生一次pass比率為59%，大學畢業考生首次pass比率只有48%，另一有趣發現係文科生平均考1.9次就pass，而理科生則要考2.3次先pass。調查結果反映考試身經百戰的高學歷人士，在英國考車牌唔見得有優勢。
筆試算係較易應付部分，首部分選擇題與香港筆試一樣主力考駕駛條例、路面應對等基本知識，次部分係睇片「打機」，睇14條短片，當出現危機時就按mouse指出，越快越準得分越高。至於路試，基本係視力測試，接著會有「Show me, Tell me Questions」問答環節，主要考車輛結構及功能知識，換言之都係要事先刨書。最難係路試，首先係按GPS帶路到目的地，接著係按考官指示行車。兩個項目各需時20分鐘，加起來就40分鐘，而且minor失誤設有15個上限，嚴重失誤衰一個即肥佬。聽起來都覺得唔易，而且據說大城市合格率更低，故此有部分英國人寧願選擇在鄉郊地區學車考牌。
唔揸都換定
英國一線城市交通較便捷，唔少人會選擇放棄養車，但搬到稍為市郊地區，無車就變得幾唔方便。考慮到在英國生活或有機會由城市搬到鄉郊，短期內唔揸車都應該有車牌傍身。另外揸住英國車牌兼具身份證明功能，去郵局拎郵件或到酒吧買酒，出示車牌就搞掂。假如你考取貨Van牌（1+2牌），換英國B牌更可以駕駛送貨常用的Transit Van，對搵工或搵兼職都有利。
受惠英國及香港之間的駕駛執照互換協議，擁有可居留簽證港人，居英首年仍可以用香港牌揸車，住滿185日就可以申請將香港牌轉做英國牌。申請人須填寫英國運輸署（Driver and Vehicle Licensing Agency, DVLA）D1表格，連同相片及43英鎊支票、香港車牌正本、香港「駕駛執照細節證明」、英國身份證明文件BRP寄回DVLA，約三個星期將會收到英國車牌。
「駕駛執照細節證明」用作證明你的車牌是在香港考取及真正持有車牌的年資，最好在出發前申請定。填妥TD320表格，連同車牌副本及160港元支票即可郵寄申請，需時約十個工作天。
假如仲未有車牌，應該在香港考邊類牌好。最具競爭力應該係棍波貨Van牌，皆因英國多人揸棍波車，二手棍波車選擇多售價及保險費又較平，有貨Van牌亦可以揸Transit Van提升搵食本事。但事實上棍波及貨Van未必人人駕馭到，而且英國棍波主流情況亦有機會轉變，契機就係電動車快速普及。有調查指現在英國每七分鐘售出一部電動車，英國亦會在2035年停售燃油車，在電動車領域自動波才是主流，所以即使手持自動波牌，將來在英國亦不乏買車選擇。
揸開車又有意到英國繼續揸車朋友，參考過來人建議，亦要好好熟習英國兩大揸車伏位。一是名聞全球超密集迴旋處，英國大小公路都喜歡用迴旋處 (Roundabout)，甚至設有內置七個迴旋處的超大型迴旋處，故此最好先在香港出名繁忙的迴旋處熟習一下出入迴旋處節奏及技巧，另外假如選擇住鄉郊，亦要留意鄉郊道路無街燈係等閒事，最好事先練定主力靠車頭光源掌握路面情況的觸覺。
伸延閱讀：
【移民英國】2020全國最宜居區域排名 口音、族種、天氣詳述
