雅虎香港財經 【移民英國】去英國打工生活 究竟要交幾多種稅？（生活篇）
移民英國，打工每月出糧會被扣稅，平日生活或投資，同樣難逃稅網。
買樓租樓要畀磚頭稅
移居英國首要解決居住問題，不論你係買定租，都不能避免支付與磚頭相關的稅項。先講買，與香港一樣買樓要付印花稅（Stamp Duty Land Tax），為抵銷疫情對樓市衝擊，2020年7月8日至2020年3月31日英國買樓印花稅有期間限定減辣，50萬英鎊以下物業首置客可獲豁免支付印花稅，非首置客印花稅3%，但要留意英國首置客定義係計埋海外，即係你在香港有樓都唔算首置客。另外買新樓亦要在明年3月31日死線前收樓才適用於新稅階，所以現在有意買英國新盤，就要留心預計收樓期係幾時。
英國各分區由區政府管理，包括圖書館、教育以至收垃圾等公共服務，區政府會向居民收市政稅（Council Tax）支持公共服務開支，性質類似香港的差餉，這筆市政稅做業主固然要畀，原來租客亦要承擔市政稅。市政稅按各區政府稅制及物業級別計算，每年約1400至1800英鎊，分10個月按月支付。
消費稅辣過日本
年前日本消費稅加碼至10%時，唔少港人大呼太辣，更表示要戒甩一年去幾次日本習慣。原來相對英國，日本消費稅仍算溫和。英國大部分商品及服務都會收取20％增值稅（Value Added Tax, VAT），與日本一樣稅項已計入價錢內。為減輕國民生活負擔，部分貨品如食品、童裝、圖書雜誌可獲豁免，家庭用電及冬天必備的暖爐VAT就只收5%。
賣產賺息都有機會交稅
移民英國新工作收入可能較香港原來職業差一截，唔少人都會打算用心投資幫補家計。不過要留心英國投資須支付資產增值稅（Capital Gain Tax）及股息稅（Tax on dividends），而且這類工作以外收入都要每年填報稅表主動申報。
資產增值稅涵蓋物業、股票、基金、加密貨幣、名畫、古董等價值6000英鎊以上個人資產，當賣出後總利潤超過年度12300英鎊就要支付資產增值稅。稅率按入息稅分級（可參考《收入篇》）計算，基本稅率（Basic）級別物業以外資產利潤交10%，高及額外稅率級別（Higher/Additional）物業以外資產利潤交20%；基本稅率（Basic）級別物業利潤交18%，高及額外稅率級別級別（Higher/Additional）物業資產利潤交28%。雖然賣樓支付的資產增值稅都幾辣，不過賣出純自住物業就可獲豁免。
至於長揸高息股賺息，股息超過2000英鎊就要支付股息稅。基本稅率（Basic）級別交7.5%，高稅率級別（Higher）交32.5%，額外稅率級別（Additional）交38.1%。
你將錢放在銀行賺存息亦可能要交利息稅（Tax on savings interest），稅率按入息稅分級計算。不過利息稅設有免稅額，年收入12500英鎊以下可享5000英鎊起始利息免稅額（Starting rate of savings），年收入12501至17500英鎊就會將你年收入減12500英鎊免稅額，再減5000英鎊得出屬於你的起始利息免稅額。例如年收入14500英鎊減12500英鎊為2000英鎊，再減5000英鎊起始利息免稅額就係3000英鎊。
高及額外稅率級別（Higher/Additional）人士每年亦可享1000英鎊或500英鎊個人利息免稅額，加上起始利息免稅額，在現時低息環境下唔少英國上班族都毋須支付利息稅。另一常用慳稅方法係開立ISA戶口（Individual Savings Accounts），ISA戶口收益可免稅，年度免稅額上限係20000英鎊，日後會另文介紹。
電視稅
在英國生活另一項難以避免的稅就係電視稅TV Licence，或許你認為自己只睇網上串流電視，屋企連電視都唔裝應該可以慳這筆錢。但TV Licence涵蓋的層面相當廣泛，包括任何裝置觀看電視節目，甚至Apple TV、Roku等串流播放平台亦在稅網之內。關鍵係收這筆數並非由英國政府及官台BBC負責，而是由外判商TV Licence公司負責，所以該公司相當積極向住戶追收費用，既然157.5英鎊一年話多唔多兼可以分期支付，就無謂冒額外支付罰款及律師費風險賴數了。
伸延閱讀：
