雅虎香港財經 笑到最後｜平行時空逼你發達的四萬點（高明）
2018年1月29日，恒指33484點成歷史高位。當年四萬點嘅預測只係一般投行分析員穩陣波睇法，較有見地嘅起碼睇6萬點，而嗰陣恒指亦持續換馬，升多一倍，其實唔難。
恒指高位六周年過去，四萬從來未見過，2022年及2024年分別試過二次回歸97價萬四點，如果用大平賣角度，價格長期處於深水埗執笠倉水平。就算計主板總市值，亦都已回到2015年水平。
事實上指數亦冇可能「跌先勁」，就算係股價表現純靠Marketing嘅殼股、IPO、繞股等，都必升有一個恒指升嘅景象，先可以引人入局，呢點中外皆然，近近哋2021年美股SPAC都係咁炒，旺市先至旺場，蘭桂坊、波鞋街都係咁嘅道理。
各地股市疫後新高 港股例外
同美股直接比較就唔公道，始終全世界資金最終歸宿，都係投奔美國，同香港日熱愛嘅旅遊地點：日本、台灣、南韓比較，就最適合，一拍埋就發覺，大家唸口簧嘅迷失二十年，比起日本，更加適用於恒指。
南韓當中最弱，但南韓綜合指數2021年都創過歷史新高，回落後都只係橫行。更加唔好提韓劇、韓星已經係全球文化指標，股市以外，香港嘅事業都迷失。
平行時空港股最大機會到達4萬點，就係2021年，疫情後唔同嘅股市都反彈然後創新高，加上聯儲局息低，美元區嘅香港本應更加受惠。就算唔係美元區嘅日韓台，都係嗰個時空爆上去，亦唔見得佢哋特登做啲咩令股市咁強，日圓貶值係之後嘅事，台積電（TSM）成為世界必爭企業都係之後嘅事，2021年嗰一轉本來係逼你發達。
至於點解零零舍舍得港股重返三萬後便沒有然後？就算你搵Doctor Strange喺幾億個可能性之中，佢可能話冇理由係萬四唔係四萬……
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
