雅虎香港財經 笑到最後｜幾代香港人嘅買樓機會（高明）
近月樓盤新聞，標題劈價出售，但睇內文一般都賺錢離場，因為早年買落，劈完價都仲有得賺，只係同高峰期比。
相對近5年買落嘅慘蝕離場。再一次證明，如果有一啲嘢睇中叫做成功，咁出生年份同地點，可能先係成功要素，就算你天生炒樓材料，喺窮國戰亂地方出世，買賣物業回報未必高過香港普通一個中產。
純粹回帶，唔同年代出世有咩好處唔好處。太偏門咩百份一仙買Bitcoin嗰啲唔計，以下係講普遍一般人都把握得到嘅機會，即係讀書做嘢同買樓。
美股外幣即時報價 多國新聞任睇
70後
理論上係最著數年代，雖然經濟增長60年代加速，但頭段要捱嘅人哋做好，出社會做嘢時外資湧入，讀到書可以做外資，唔讀書仲有製造業未息微。雖然到80年代尾90年代初都係幾千蚊人工，但係銀行LTV又鬆手啲，又冇壓力測試
97金融風暴至03年沙士漫長低潮，太早出世可能人90年代廿零歲見個個炒樓多數上咗車，97年上車不幸捱到03年先捱唔住甩手，就落過之後機遇。期間香港衰退，嗰期亦唔太興買樓，當然亦有人執平貨，但捱得過沙士都係實力。
80後
比70後好運，係97年金融風暴嘅時候未投入社會，冇錢可輸。不過因為學位多咗，大學生冇乜特別，外資湧入時要上位都畀再上一輩坐定哂，鄰近地區成為世界工廠，香港製造業正式冇份，讀唔成書都係做sales。
不過，最長嘅樓市牛市亦係呢段時間發生，03年至2015年十幾年買入時機，遲畢業都等埋你儲首期買樓，兼且超低利率。
90後
大學畢業大約2011年後，假設90後多數醒目仔5年都儲到首期，最快2016年買樓，現時樓價大概回落到2017年水平，打和多少少，叫做賺咗租，但如果揸到今日，應該同樓價升幅絕緣。
90後投身社會時，多咗樣嘢叫社交媒體，加上製造業已經完全失蹤，讀唔讀得成書都可以經營自媒體，算係樓價冇得賺嘅一種新機遇。
00後
大學畢業已成基本，除咗嗰科有優勢，大學本身冇優勢。
雖然樓價回落，但係最早出世都係畢業無耐，未必累積夠資本買樓。
00後有一個獨有優勢，就係上網嘅人開始習慣上網畀錢買內容，造就好多一部手機已經可以經營訂閱製內容服務嘅經營商，由於賣呢類服務要足夠後生，90後雖然都好後生，但00後更後生，消費者梗係識揀，所以生啱年代都重要。
呢個優勢更加係2010後冇，因為2010後大個時，AI生成圖片及影片已經分唔出真人定AI，到時肯定冇咁好賺。
最後：
教育、工作、買樓，係好多人嘅終極訴求。但係唔出生係適合嘅年代，一般人幾乎無法打破命運。所以「本來就應該躺平」係至理明言，冇機會時，乜都唔做，好過夾硬做損手。
