笑到最後｜從口水倉到東升西降（高明）

社會對講財經嘅人特別嚴格，標準係自己推就要自己買。 (krisanapong detraphiphat via Getty Images)

芒格去世，其實都係意料之內，畢竟都99歲，早幾年高明去過一次巴郡股東會，返嚟已經喺節目入面話去一年少一年。依家得返畢菲特獨腳戲，仲有幾多年會都唔易估，但若股神仙遊後，繼任人仲搞唔搞到股東會好似嘉年華咁都係未知數，而且號召力一定不及兩老，遺願可能係繼續搞，但係搞幾年一旦叫座力不足慢慢縮皮都唔出奇。

下載Yahoo財經APP

美股外幣即時報價 多國新聞任睇

第一代實倉財經KOL

追思芒格，因為佢哋可以話係第一代實倉財經KOL，上市公司好多嘢都要公佈，買賣買買都係公開。

發佈渠道多 人人都係財經KOL

只要公開講過財經，就係財經KOL。又因為現今太多Live、社交媒體、討論區，所以有account又有發表過股市偉論嘅任何人，都係財經KOL。財演係財經KOL、討論區網民係財經KOL、上市公司高層都係財經KOL，只要有心，再加一個發佈渠道，人人都係財經KOL。

只要有心，再加一個發佈渠道，人人都係財經KOL。 (d3sign via Getty Images)

間中網上都會有聲音，批評財經KOL齋講冇買，或者更甚係升完先話有買兼食埋，所以應該立法禁止口水倉，所有公開講股票嘅人都要貼倉。

社會對講財經嘅人特別嚴格，標準係自己推就要自己買，都啱，始終投資關乎身家。如果網民將同樣標準放諸更重要嘅性命同健康，香港呢塊福地一定更有福。

原理其實同財經KOL一樣，好似Tesla（TSLA）行政總裁馬斯克，雖然首富名車多，但都要對外宣稱Tesla先係主要代步工具，日日都用自動駕駛，間中「被人影到」放上Youtube。如果集體運輸系統高層返放工時段畀人影到逼地鐵逼巴士，將會係好好嘅PR。

又以芒格畢菲特兩老為例，巴郡（BRK.A）係可口可樂（KO）大股東，近年巴郡股東會有直播，大家都見到兩位加埋接近兩百歲嘅人，直播喪啪可樂。如果食大家樂（0341.HK）、翠華（1314.HK）之類，會撞到高層搭枱，其實都係一件美事。

當然仲有好多其他例子例如設計教育同仔女讀書等，不過唔再多講。總之，香港網民對財經KOL團火，如果應用喺其他層面，一定會鞭策香港繼續發光發熱，東升西降指日可待，所以香港真係一塊福地。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周六刊出