笑到最後|打氣文:大膽面對股價下跌(高明)

·4 分鐘文章
當你買入股票之後即使面對下跌,甚至係三成以上嘅下跌,係完全正常嘅現象。
當你買入股票之後即使面對下跌,甚至係三成以上嘅下跌,係完全正常嘅現象。

最近見到市場上唔少人經歷今次嘅下跌而有啲心慌,部份更加將之形容為股災,近期港股終於反彈,反彈幅度比美股更強,而且美股亦都叫做回穩,值得借此機會打打氣。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

面對今次調整感到氣餒,主要有兩個部份:一、朝早輸港股,晚上輸美股,心情當然唔好;二、最近先入場炒美股,食正跌浪,反而港股反彈力度更強,低沽高買再跌,精神稍為差啲,隨時會發誓從此唔掂股票。

高明間中會話自己係真正嘅圖表派,同其他圖表派嘅分別係,實實在在咁經歷過圖表上邊嘅股價升跌,將自己嘅資金置身於圖表當中,成為真正嘅圖表派。 個人對於美股,有無比信心,撇開較為實在嘅因素,本身正常嘅股市,就係處生於世界第二古老行業:賭錢,只要人類有貪念、有慾望,甚至乎,有家庭,有需要提升家人生活質素,賭會存在。過去10年,美股恰巧成為一個全球投資者認證嘅賭場,雖然按升幅計未必係全世界第一,但係資金進入、離開已經有長遠歷史,值得信賴。

大家可能會問,賭錢,即係做閒,基本上長賭必輸,即使美股係全球認證賭場,做賭仔都會輸。不過,莊閒其實係睇格局,冇錯喺美股入邊,大家都只係散仔,但係如果拉開全球,霸權股嘅業務等同全球徵稅,喺呢個時空上邊,有股票嘅成為莊,冇股票嘅成為閒。

用平常心捕捉下個升勢

在推上另一層次,全球央行瘋狂濫發鈔票,持有鈔票嘅人全部都係閒,只得央行一個大莊,求神拜佛手上嘅購買力被剝削速度冇直接持有鈔票咁快,美股咁啱出現低息借貸回購股票操作,喺紙幣溝淡情況下,竟然出現股票供應減少嘅怪異現象,企喺邊一面,令你由最閒,變成冇咁閒,突然間提供多一重選擇。

所以當你買入股票之後即使面對下跌,甚至係三成以上嘅下跌,係完全正常嘅現象。因為你進入咗第一重賭場莊閒嘅階段, 莊家唔會派錢,賣得比你,當然要炸散你。但係如果你買啱,然後捱得過呢個階段,將會進入第二個層次,就係成為霸權嘅一部份,即使佔嘅比重好低。然後再進入第三階段,就係央行對全球鈔票持有人嘅剝削,你僥倖成為唔係餐搵餐清(Pay check to pay check) 嘅社會階層,無需不斷工作換取食物,反而有閒錢轉換成其他資產,喺濫發鈔票嘅終極剝削下,成為較少受剝削這一個階級。由於社會階級係相對,所以你唔小心就提升咗社會階級。

所以,股價下跌就好似見未來外父外母打牌一樣,下跌幅度就有如鬆章輸錢嘅金額,要入門,等外父外母接受,呢啲禮金,唔慳得。分別在於,聯儲局呢個外父外母,冇得揀,一定要受。

睇完呢篇文,大家係咪覺得輸錢輸得開心咗呢?只要你跌到慣,其實就唔會太上心,然後可以用平常心,去捕捉下一個升勢。

資金尚算自由出入、贏咗會賠錢、規矩未完全崩壞、有足夠往績證明守規矩嘅市場已經買少見少,再發展落去,美股可能變成全球賭場壟斷,任何建制搵食嘅投資者都要幫襯美股,對建制失望嘅人就投向加密貨幣,其他市場漸漸變得唔重要。所有建制投資資金都流入一個市場,其實睇唔到有咩值得沮喪。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周三刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能