笑到最後｜梅建國的投資啟示（高明）

阿根廷奪得世界盃後，網上立即有人認親認戚，指梅西（美斯其他譯音）本為四川人，上一代移居阿根廷。 (TOMAS CUESTA via Getty Images)

世界盃終於結束，因為就卡塔爾天氣，首次聖誕節前舉辦，職業聯賽季中踢，感覺上球員冇咁攰，比以往更生猛。當然今屆奬金更闊綽，球員更落力，而卡塔爾主辦，賽前有不少爭議，開支更加係歷來最高，電視觀眾角度反而覺得搞得幾好，再一次證明錢唔係萬能，但好多錢嘅時候就解決到好多問題。

下載Yahoo財經APP

美股外幣即時報價 多國新聞任睇

美斯奪冠，應該係眾望所歸。網上立即有人認親認戚，指梅西（美斯其他譯音）本為四川人，上一代移居阿根廷，之後故事大概依現實寫，去西班牙踢波之前名成利就。高明一開始以為係惡搞，因為一、中國文化本來視叨光為負面，特別係叨光對象名成利就後先認親認戚；二、更嚴重係美斯細個本身有侏儒症，去到第二度就成為球王，如果故事屬實，當中含意比起叨光更負面、更不好說。不過後尾有其他廣州、湖南、黑龍江版本，作者似乎係認真。

多元係取勝關鍵

人類起源嚟自非洲已有科學驗證，夾硬講邊度嚟只係幾代前祖先嘅暫居地，真正鄉下都係非洲。因為搵食緣故四散，喺唔同氣候之下發展出唔同體型，適合唔同嘅搵食環境，幾萬年後因為全球化再聚首一堂，唔同體格適合唔同角色。

以今屆為例，法國、摩洛哥都係擁抱唔同出生地球員，多元取勝。一般會覺得阿根廷只有白人，但球隊其實都係唔同種族，從姓氏中有15個西班牙姓、8個意大利、2個波蘭、1個愛爾蘭。

多元、容許唔同種類嘅人組成，幾乎係現代取勝嘅關鍵。同一套一樣可以套用落股票市場，例如美國人擅長破壞性創造，創造科技業唔同範疇，執行上嚟都要由東亞台灣、南韓細緻咁代工晶片，諗大橋唔係填鴨教育嘅東亞強項；但細緻及機械式工作美國人做得唔好或者太貴，撈埋就啱啱好。

如果一個股市就等於一隊球隊，吸引到唔同地方嘅精英企業去掛牌充當外援，例如台積電（TSM）、ASML（ASML）都被視為美股無異，再加上前首富馬斯克係非洲人，一樣可以喺美國發達至首富。呢種環境，就係有冠軍相嘅環境。

現時美股可能有如美斯早幾屆失意，但繼續吸納唔同其他地方成功企業，好快可以爬返起身，並且再次成為享受勝利嘅成果。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出