雅虎香港財經 笑到最後｜樂觀睇小巴牌斷供潮（高明）
市場一度傳出中國香港特區小巴牌被call loan，經有關方面嚴正澄清，只係車主斷供被銀行拖走抵押品，並唔係call loan。
美股外幣即時報價 多國新聞任睇
唔理係斷供定Call loan，一個經濟體最忌就係出現資不抵債無力償還。斷供前題必然係資產價格大幅下降，原本死慳死抵都要供埋，資產價格跌至十份之一（據報紅van牌由高峰期700萬元大跌九成至70萬元），再供都係供死會，不如提早將間有限公司清盤。
對上一次最嚴重斷供潮，要數08年美國次按風暴，業主按揭超過100%，多出嘅5%至10%用來裝修，住咗幾年當交租，次按風暴後樓價大跌，放低鎖匙直接走人，單位變銀主盤。
本來只係買家同銀行嘅交易，按揭斷供銀行上身，當年則透過按揭資產抵押證券將次級按揭賣通街，全球一齊共享債務違約。
小巴規模則細好多，據講今年預計會有100部小巴斷供被拖走，假設全部摸頂700萬港元買，兼一毫子息未供，財務機構拖走部車當折讓至50萬元銀主盤承接，財務機構只係蝕6.5億港元。任何數字換算美元，都唔係特別大，連一億美元都未夠，香港財務機構食開大茶飯，只係一筆好細嘅數字。
釋放資金重回夜繽紛
據講，小巴牌一般夾錢開有限公司入市，攤分起嚟，每人只係蝕好有限，就算融資渠道係嚟自本身層樓加按夾錢，都只係一筆好細嘅數，相對亦冇乜影響。
中國香港按揭真正打大佬仍然係物業，普遍大約同高峰期比跌兩成，如果係一般上車盤則通常冇咗份首期，但賺咗住，同埋成為業主嘅身份，所以都係賺。
有地產商會人士指再跌兩成銀行會call loan，本欄引用小巴商會講法，冇call loan，只有斷供。當睇唔到再供落去嘅前景時，業主主動斷供，無謂再供死會。
中國香港夜市疫弱，因為資產價格不振，就算唔計加息因素，睇見啲價格，邊有心機出街？廿蚊粒魚旦點解唔志在？唔係因為月尾有糧出，而係㩒幾個掣賺成個月糧，最近美股夜繽紛，應可支持魚旦燒賣行情。
至於香港夜繽紛嘅出路，可能就係靠斷供潮。樂觀地睇小巴斷供潮，一路供死會嘅話，供落去係無底洞，把心一橫斬咗佢，成個人輕鬆哂，每月死會嚿錢可以重新消費，由700萬元跌至70萬元，跌幅去幾多次中國深圳同日本都得，嚟緊如果出現斷供潮，有望釋放資金重回夜繽紛，所以香港真係一塊福地。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
