雅虎香港財經 笑到最後｜港股大牛市 細數美股白做股（高明）
恒生指數強勢升上兩萬點，美國減息成就港股大牛市，再次證明本人預言正確：香港真係一塊福地。
美股外幣即時報價 多國新聞任睇
回到正題，作為平衡，美股表面風光，內裡陰乾，有別港股兩萬點大時代，美股亦有大把白做股，持貨至今過去幾年等同白做，以下就係當中例子：
Ark Investment（ARKK）
前契媽Cathie Wood主理嘅方舟投資應該係白做股代表之一。Ark Investment 係由 Cathie Wood 喺2014年創立嘅一間投資管理公司，專注投資喺創新科技領域，特別係引領未來嘅新興產業。ARKK 係佢哋旗下嘅一隻主動型管理ETF（交易所買賣基金），全名係 ARK Innovation ETF。ARKK 專注投資於基因工程、人工智能，諸如此類。2019年底股價為50.05美元，最新報47.27美元，就快5年，跌5.55%同一嚿錢，2023年放有息嘅存款，食正加息周期賺利息，都跑贏呢隻。
Verizon Communication（VZ）
過去5年股價下跌25%，股神畢菲特旗下巴郡喺2020年曾經大手買入Verizon嘅股份。巴郡買入Verizon嘅原因可能係因為其穩定嘅業務模式同高股息回報，符合巴郡長期持有、尋找價值型股票嘅投資策略。然而，喺2022年，巴郡開始逐步減持Verizon嘅股份。除咗顯示5G嘅發展同市場競爭對激烈外，更重要呢隻係收息股，現價計股息率雖有6厘，但我現金收息贏硬，唔一定要同隻股攬炒。
迪士尼（DIS）
過去5年迪士尼下跌28.5%，除咗Disney+炒咗陣外，回歸基本股價幾100美元咁上下，相對主要競爭對手Netflix（NFLX）升1.67倍。迪士尼擁有大量知名品牌，包括Pixar、漫威、星球大戰同國家地理，亦係全球多間主題樂園嘅營運者，例如迪士尼樂園同迪士尼世界，揸住一手好牌但都冇乜用，疫情後其實升過所以冇得懶，做咁大生意搞一大輪其實股票白做。
所以，美股都有好多半紅不黑嘅股票，啲股票5年都唔升，世界已經變緊，都應該Quit埋佢。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
