雅虎香港財經 笑到最後｜香港全民玩雀 下隻NVDA出現可期（高明）
政府統計處公布去年10至12月第四季的《綜合住戶統計調查按季統計報告》，勞動人口參與率跌至57.1%，是1985年有紀錄以來的新低。雖然香港好多人口頭禪都係我最鍾意返工，但心底願望就係唔使做，留喺屋企養雀，香港終於向全民玩雀時代邁向，再次證明香港真係一塊福地。
美股外幣即時報價 多國新聞任睇
研究實證 全民玩雀有福氣
事實上，話全民玩雀有福氣，並唔係諷刺，更加唔係吹水。美國聖路易斯聯儲銀行做過一項關於勞動參與率（LFPR）嘅研究，指出喺19疫情期間，勞動參與率出現顯著下降，美國有373萬名工人「失蹤」（Missing workers)，同時，股票同房地產等資產類別喺2020年同2021年期間獲得了顯著嘅實際回報。
研究發現，股樓喺2020年同2021年期間大升創造財富效應，促使一些老年人提前退休或離開勞動力市場。利用一個估計嘅財富效應對勞動供應嘅模型同基於資產組合組成嘅微觀數據，研究表明，由於資產回報所導致嘅淨資產變化，可以解釋2020至2021年期間LFPR下降嘅一半，以及同期間"過剩退休"超過80%。
文章結論認為，財富效應對於解釋同期勞動參與率跌嘅顯著下降起到咗重要作用。
股市升 財富效應現
網上搵唔到同類研究嘅跟進研究，但美國股市、樓市都已破疫情前頂，甚至經濟亦強到要加息煞車，唯獨是勞動參與率仍然低過2019年。根據呢啲數字，大致可以超譯新結論：勞動參與率越低，資本市場越勁，推算呢班美國玩雀退休人士，錢太多又放返入股市，出現財富效應、退休、再投資資本市場再升嘅良性循環。
我嘅訴求係返工，只係打工仔對住鏡頭嘅過渡性嘅言論，香港真正核心價值係唔使Do，統計處數字已經顯示香港邁向全民玩雀階段，撤辣已令樓價率先上升，行緊美國嘅2021年嘅周期，下一件會發生嘅事，就係港股出現一隻有如Nvidia（NVDA）嘅股票，拆細後升上過千蚊，只要勞動人口參與率夠低，呢件事自然會發生。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
