雅虎香港財經 笑到最後｜香港未解鎖的一項潛能（高明）
香港股市及樓市現況現時有目共睹，一來毋須多講，二來再講會令人覺得落井下石。畢竟本欄優質讀者一早已經轉場美股，美股即使今個月初黑色星期一股災，好快又反彈，其他人點講都好，持貨者心中有數。
美股外幣即時報價 多國新聞任睇
港股港樓有情意結
不過，始終第一次接觸的股市係港股，第一次接觸嘅物業市場係港樓，點都有啲情意結。港股不濟，最重要指標係IPO新股，相對美股霸權股一旦稱霸，可以強勢幾十年，例如恐龍年代的通用電氣（GE）、可樂（KO）、麥當勞（MCD）；中世紀嘅蘋果（AAPL）及微軟（MSFT），以至近代的Tesla（TSLA）及Nvidia（NVDA）唔知點放，93年創辦係中世紀級，真正股壇紅係近十年）。而港股係炒新鮮，不論係中資來港新上市，定係現有上市公司分拆，港股同香港餐廳口味一樣，不鮮不吃，亦解釋現時市況嘅低迷。
至於港樓，亦一樣係投地主導，投地價成為一個指標，加建築成本等撐起成個樓價嘅心理關口。
本欄留意到同股樓有關嘅政府機構同組織，都係搵律師、會計師、政務官等專業人士嚟做。
香港雖然係國際城市，但本身冇產業，無法產生一個同國際級發明家有共鳴嘅人，即係冇黃仁勳嗰類型嘅人幫你唱股票。
龐大銷售人口顯優勢
就算冇黃仁勳，冇Taylor Swift，冇美斯，香港人才上本身有優勢，唔使羡慕其他人。香港人才優勢在於龐大銷售人口，上社交媒體打「我想買保險」應該唔難收一打行頭十足嘅卡片，就算健身大隻佬都有條數跟。退一萬步茶餐廳待應口黑面黑趕食客食光速餐，都係跑緊條「翻抬率」數，可見香港「無處不Sales」深入骨髓。
Sales嘅另一邊，就係合規部門，後者通常都係專業人士，律師會計師嗰啲，相對嚟講香港一直比較信任專業人士。過去廿幾三十年，順風順水，啲錢湧埋嚟逼你收嘅年代，搵個專業人士睇緊盤數，好合理，亦係成功因素之一。
時移勢逆，依家冇刁畀你任揀，專業人士謹少慎微無用武之地。僧多粥少，要做大個餅就要主動嘅，搵Sales做搶客先係未來，香港銷售底子厚，只要稍為改變，由銷售員管治金融地產，即使再低迷都起碼有單，如果冇單自然就會淘汰，換另一個，就好似各行各業嘅銷售生態一樣。
香港四大支柱失色，如果關鍵職位換上銷售人員主導，最低限度都可以窮得只剩下刁，無處不Sell客，所以香港真係一塊福地。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
