雅虎香港財經 絲絲講場：電子支付搭車又多一個選擇
香港嘅電子支付應用面日廣，好似搭公共交通工具，唔單只可以畀八達通或支付寶等，最新又多一個銀行手機應用程式（App）可以用作支付，消費者變相多一個途徑將電子支付連接信用卡賺積分，係咩咁着數呢？
事緣中銀香港（02388）旗下BoC Pay推出全新「乘車碼」掃碼付款功能，並且率先喺九龍巴士及龍運巴士電子支付系統「e度嘟」使用，覆蓋全線超過4,000輛巴士、逾400條巴士線。「乘車碼」支援「免密支付」功能，乘客毋須輸入密碼，即可以直接在收費器上方鏡頭掃描乘車碼繳付車費，享受以電子支付方式乘車所帶來嘅便利。
用BoC Pay坐九巴有優惠
聽九巴介紹，旗下九巴及龍運巴士早年已喺全線車隊增設電子支付系統，連同新加盟嘅BoC Pay，系統支援電子支付方式將增至11種，期望提供更多選擇，讓乘客喺出行方面融入電子消費模式。事實上，電子支付已成為大趨勢，相信「e度嘟」有助推動與內地嘅支付跨境聯通。
原來，中銀香港早年已為九巴和龍運巴士嘅電子支付系統提供「BoC Bill」綜合收款服務。截至今年第三季，兩家巴士公司嘅電子支付交易筆數較上一季增加逾兩成，反映市民大眾於出行時日漸習慣以電子支付方式繳付車資。由尋日起至12月31日，乘客使用BoC Pay乘車碼乘搭九巴及龍運巴士每程滿10元，仲可享3元車資減免；同時可以享額外5倍積分回贈，以抵銷簽帳額。想知詳細條款，精明嘅消費者快啲上網睇番銀行資料啦！
