蘋果收購任天堂只是最終幻想

任天堂股價近日忽然爆升，原因只係《Barron’s》一篇分析文章建議蘋果想業績翻身，捷徑之一係收購任天堂。不過此建議其實係炒一個投資的final fantasy冷飯。

蘋果收購任天堂，多年前已成為外國遊戲玩家及果粉的熱門話題。原因正如《Barron’s》分析文章所講，兩間企業在性格及優勢上有不少共通點，大家都偏好自成一家系統，曾經歷大上大落，產品開發上很堅持自己的原則，擁有大批死忠粉絲等等。事實上不少蘋果長情粉絲，往往都同時係任天堂死忠玩家，所以很自然會有此幻想。而《Barron’s》的建議，亦只不過是把討論區「FF」冷飯再翻炒而已。

雖然係「FF」冷飯，可能不少人都會想蘋果有的是錢，Tim Cook又放聲只要找到有互補價值的目標，不排除啟動大型收購。表面睇任天堂遊戲與蘋果收費業務有互補作用，但任天堂在手遊市場的吸金力仍是問號，收購任天堂後，任天堂遊戲應否獨家在iOS系統上架又是一個頭痛難題，更麻煩的是蘋果派人插手任天堂營運，未成功催谷任天堂盈利前，已可能嚇走任天堂最核心的管理及開發精英。

從收購成本睇，任天堂大股東摩根大通都只係佔11.22%股權，要搞掂其他與日系長情股東如京都銀行，蘋果就要大手筆加碼。咁樣浪費子彈， 相信Tim Cook寧願動用銀彈，與任天堂及迪士尼強化合作關係，充實蘋果的娛樂服務，才符合他的數口精風格吧。

===============

精選資訊網站「中環街市」 臉書粉絲頁