【財爺派錢】忽然有一萬蚊 可以點用來賺息？

一如所料財爺公布向18歲以上香港市民派錢一萬元，假如你唔算太等錢使，咁可以點用呢一萬元賺取高息？

定存正值通縮期

連堅持審慎理財的財爺都玩「大撒幣」派錢，可想而知今年經濟有幾差。假如你擔心經濟下半年繼續衰，決心這一萬元都係保本至上，最簡單穩陣選擇係港元定存。

可惜近期大中小銀行連橫劈港元定存息，令定存賺息吸引力打了折扣。揀港元定存另一難題係門檻較高，以一萬元為基準選擇其實唔太多。最實惠之選係虛銀眾安銀行，12個月定存有兩厘息，入場費1蚊有交易，可借機親身感受一下虛擬銀行服務有幾方便。

至於傳統銀行，可考慮招商永隆及中信銀行（國際），透過手機App或網上銀行開戶，一萬港元定存12個月分別可賺2.35厘及1.9%厘息。假如你想儲多點生活儲備，亦可以用呢一萬元為起動基金玩零存整付，例如富邦銀行的零存整付計劃，每月供2000港元，12個月息率都有1.4厘，當迫自己儲多個錢都是不錯的選擇。

趁跌市買高息股

回帶望返沙士時都知道疫情消退後股市反彈力有幾勁，假如你對下半年中港市場復甦有信心，不妨趁近來股市調整入定一啲高息股捕捉賺價賺息機會。

以一萬元為基準，穩陣之選有港燈及香港電訊，港燈雖然受制於准許回報下調，但疫情之下仍有相當防守力，至於香港電訊，核心業務吸金力強且兼具5G及虛擬銀行概念，稍為遜色係買一手要補多千零蚊。復甦概念則可考慮載通，載通核心九巴業務近來確實難做，但當疫情消退九巴收入應可快速收復失地，而且載通觀塘項目的回報仍值得憧憬。

唔想一注獨買某隻高息股，又有無「攬炒」選擇？以一萬元資本投資一籃子高息股可考慮高息港股ETF。其中人氣最高係未來資產恆生高息股ETF，這隻ETF收益率達5.63厘，但要留心持股組合頭幾名玖龍紙業、建滔集團、偉易達、禹州地產、富力地產賣點都係高息，防守力就平平，不過整個投資組合持股相當分散，有助攤勻風險。

唔想太進取亦可考慮平安香港高息股ETF，投資組合揸重建行、中行、滙控、工行及金沙，不過擔心投資組合太偏重金融股，這隻ETF未必是你杯茶了。

最後要溫提一下有心賺息可以立即行動，皆因賺息係用時間累積回報遊戲，據財爺透露目標暑假可陸續發放1萬元，與其呆等就不如用手頭鬆動資金提早起動了。