迫爆腦場的投資啟示

.

疫市實現王家衛電影中的疏離世界，但周末時深水埗腦場就出現人山人海奇景，迫滿搶購電子產品人潮。腦場逆市迫爆的奇景，其實可以為我們帶來一些投資啟示。

龍頭腦場出現迫爆場面，很快便吸引媒體踩場追訪。從媒體的實地訪問，明顯腦場人流來自兩類人，第一類係入手打機產品的年輕人。受訪年輕人解釋因為停課太耐又無得去街好悶，唯有落場掃主機及遊戲。其中最hit產品首推任天堂Switch，遊戲店更持續出現缺貨情況，皆因不少熱門遊戲吸引女性玩家及運動愛好者，在Sony未出PS5前佔盡顧客群多元化優勢。本地散戶要搵投資任天堂門路，最簡單捷徑係買騰訊，騰訊係任天堂Switch內地代理，估計Switch在本地大賣的元素，在內地市場同樣受落，而且內地年輕玩家都有解悶買機誘因，難怪騰訊近日股價已重上380元以上水位。

.

第二類無懼人迫人衝落腦場係上班族，疫情下大中小企都推行在家工作制，雖然唔使每朝起身趕車，但唔少上班族就即時面對家中無架生難題。自從智能手機大普及後，以往被視為居家必備的電腦已被視為多餘產品，不少人放工後只會用手機覆電郵覆訊息，頂多間中會用下平板電腦，至於電腦就任由封塵，甚至不再添置。現在忽然要坐定定在家辦工，又必須使用工作上常用的幾款軟件，唯有急急到腦場睇laptop，再順手掃埋鍵盤、滑鼠，還有開視象會議用的連咪耳機。類似的上班族搶購潮相信在世界各地大城市都會上演，想吸納受惠股，消費電子產品股、電訊、晶片股都可以考慮。

.

先講消費電子產品股，最著數應該係有品牌溢價、毛利率較高的一線品牌。皆因唔少上班族會覺得既然要買，就不如花多少少錢買部好啲。所以疫情之下，蘋果都急急為入門版MacBook Air換上好打鍵盤，再為iPad Pro及Mac Mini升級，睇來就係為搶奪這一浪家在工作商機。至於PC陣營，大贏家較有機會係微軟，因為要用上Office及用Teams開視象會議的上班族，可能會順理成章購買Surface系列，貪其輕巧又有得篤芒，心理上亦覺得行微軟自行軟件應該會更順。

至於晶片股，有本事食盡Mac及PC出貨量急增首推Intel，皆因兩大陣營都會用上其出品。打機及在家工作無網絡難以成事，光纖網絡深入各區的大型電訊商如香港電訊及香港寬頻都可以受惠，這一波家居寬頻升級吸金量，可能賣5G Plan豐厚得多呢。

===============

精選資訊網站「中環街市」 臉書粉絲頁