雅虎香港財經 《那些我愛過的人》「朱炳」顧定軒與角色相似 為追夢做過廚房及紮鐵
無綫愛情小品劇集《那些我愛過的人》喺今晚就播映大結局，劇集中有唔少演員表現唔錯，當中包括第一次拍無綫劇嘅顧定軒（Zeno）。
顧定軒今年25歲，喺劇中飾演方樂汶（黃翠如飾）嘅繼仔朱嘉炳，爸爸（翟威廉飾）車禍過身後由樂汶一手養大，二人關係都幾好。雖然佢成績唔係咁好，但佢好努力追夢。顧定軒憑住喺劇中嘅亮眼表現，成功獲得關注，人氣急升。顧定軒之所以完全代入角色，其實係因為現實中嘅佢同朱嘉炳好相似。佢哋兩個都係喺單親家庭長大，顧定軒係由嫲嫲湊大，而且兩個都係追夢少年。
顧定軒細細個已經知自己鍾意表演，中學開始做model，接拍不同短片，14年接拍電影《藍天白雲》，可惜電影一直上映無期，令佢生活難上加難。顧定軒喺三年前經歷零幕前工作，需要靠炒散維持生計，試過做廚房及紮鐵，大熱天氣要搬啲熱到燙手嘅鐵，做到差啲中暑。之後佢選擇專注拍攝，因為怕做落去就一世。為咗慳得就慳，顧定軒寧願食少啲，盡量留喺屋企唔洗錢。等咗四年終於捱出頭來，《藍天白雲》終於上影，演出亦有不俗口碑，之後，佢仲有機會接拍《明月幾時有》及《翠絲》，上年亦有機會同郭富城和楊千嬅合作拍攝《麥路人》。至於電視劇方面，佢亦拍過唔少，例如香港電視《大眾情性》、RTHK《手語隨想曲6》、《火速救兵IV》、ViuTV《身後事務所》及待播劇《男排女將》等等。
