雅虎香港財經 《那些我愛過的人》連詩雅喊戲連場 睇到觀眾心都痛 網民大讚好戲
無綫劇《那些我愛過的人》唔經唔覺接近尾聲，好多迷團都已經陸續解開，好似噚晚就講到書文（連詩雅飾）同姐夫（翟威廉飾）嘅「床照」，令到書文同希晨（馬貫東飾）夫妻感情轉差。雖然希晨係相信書文，不過要有證據去證明，所以佢就同煜誠（林文龍飾）一齊去搵真相，最後希晨喺姐夫嘅電郵搵到關於「床照」嘅短片，真相揭開後樂汶（黃翠如飾）及希晨都好內疚。即使係真相大白，不過書文因得唔到佢哋嘅信任，而覺得好委屈同難過，仲搞到動胎氣入院，好彩最後冇事。
咁淨返兩集，仲有啲咩嘢未交代呢？例如書文啱啱換咗肝，佢會唔會冒險繼續懷孕，幸而（黃芷晴飾）突然病發會唔會有生命危險；煜誠（林文龍飾）又會唔會同樂汶求婚等等。
連詩雅喺社交網站上載劇集片段，及留言：「信任。係支持和理解。大家站在自己的立場裡，感受自己的痛心，但有時就會因為咁，而忽略別人的痛心。誤會就會這樣，一個又一個的堆積如山，那爆發的威力真的難以想像。#這一場真的很痛心#但真相終於揭曉#大家都心力交瘁#方書文#方樂汶#古希晨#那些我愛過的人」
連詩雅呢幾場喊戲，獲得唔少網民大讚佢做得好好，紛紛去佢社交網站留言，例如「👏演得好好啊！呢幾集睇完之後我都好莫名咁傷心😔今日教曉我要無條件咁信任及支持我愛嘅人，多謝🙏」、「你呢場戲好得，感情好真，講對白個聲線用得好好👍👍👍」、「呢一幕好心酸好心痛 講唔出嘅痛 你同翠如演得好真實 加油！」、「依度演得十分好好👍好表達到 俾人不信任的感受，個種心裡面的難受🤧」、「你又靚女又做得好好呀👍👍👍❤️❤️❤️」、「連姐演得好好，見到你哭我好心痛❤️😭」及「真心演得好好，好心痛方醫生😭😭❤️❤️」等等。
