金融花生│地產股關鍵字：套現（言平）

部份本地地產商負債不輕，有套現減債壓力。 (Nazira Zhu via Getty Images)

2月28日公佈既《財政預算案2024》終於告一段落，財爺陳茂波一如市場預期，宣布樓市全面撤辣，買家無須繳付三大印花辣稅，而金管局亦都識做，即時助攻宣布暫停壓力測試。市場再次關注地產市場既走勢同發展。

下載Yahoo財經APP

美股外幣即時報價 多國新聞任睇

發展商負債比率全線升

關於地產發展商，新地（0016.HK）、新世界（0017.HK）及信置（0083.HK）都相繼公布業績，長實（1113.HK）及恒地（0012.HK）即將於下周四（21）同日派成績表，相信派息同負債水平會繼續成為市場關注焦點。恒地最近可謂頻頻出貨，旗下灣仔莊士敦道全幢商廈喺去年12月傳出獲財團以約11億元洽購，比早前市傳叫價係18億元平7億，現時獲洽購呎價約1.5萬元。截至2023年6月份，恒地既總負債，高達1919.56億，唯有寄望年底美國落實減息。

至於其他地產發展商都唔好得去邊，睇返出咗業績嘅地產商，除咗信和繼續淨現金之外，淨負債/權益比率新地係21.1%、希慎27.2%、恒隆31.9%，基本上都係全線上升。

新地手頭現金由153億減少近一半，得返79.3億，跌咗成48.1%。 (NurPhoto via Getty Images)

新地負債增 賣樓壓力非輕

講到負債重，除新世界外，同屬四大發展商的新地都唔好睇少，如果將2023年12月底同6月底做比較，大家就睇到個情況，總負債由1,251億上到1,357億，短短半年就升咗8.5%，仲有當中有71%係浮息，即係加息因素會大大影響新地既利息成本。

再望望新地手頭現金由153億減少近一半，得返79.3億，跌咗成48.1%，淨負債率由18%升到21%。望到以上既數據真係一額汗，都咪話唔驚。另外，公司一年內到期債項有成203億，債務淨額已經增加到1,278億，多過6月底時嘅1,098億。至於新世界債務淨額約1,189億，較2023年6月的1,307億元減少。

咁即係點？即係新地今年都有唔細嘅賣樓壓力，要套現減債，如果去唔到貨，可以預期個總負債會繼續上升，利息成本只會繼續有增無減。所以後財政預算時代，嚟緊地產市場嘅走勢，要望望新地，有可能比長實更大機會放深水炸彈，要錢唔要貨，蝕住放貨都要賣。

言平

本欄隔周四刊出