雅虎香港財經 金融花生│歐洲國家盃C朗的自我救贖（言平）
話說歐洲國家盃進行得如火如荼，喺十六強，葡萄牙對斯洛文尼亞，雙方戰至加時一刻仍然未分勝負，就喺呢個時候，葡軍獲得十二碼，機會係留畀有準備嘅人，當然由隊長C朗親自操刀，雖然十二碼一係入，一係唔入，但結果被對方門將奧比歷撲出，一個40歲身經百戰嘅大男人，都忍唔住流下男兒淚。
場波踢完120分鐘之後，葡萄牙同斯洛文尼亞仍然未有紀錄，要進入互射十二碼階段。就喺呢個時候，C朗企出嚟，代表葡萄牙主射第一輪十二碼，結果一射入網，之後向球迷做出道歉動作，希望球迷原諒佢喺加時射失波。
店舖做得好 生意自然來
其實球場係咁，商場亦係咁，今次射唔入，繼續努力，喺邊度射失，就喺邊度射返入。當呢邊廂人人都話執笠關門大吉，但另一邊又有新舖開業，唔單止，有啲店舖重成日大排長龍，做到唔夠人手。C朗之所以成為一名世界級球員，就係有份打不死精神。香港人出名識食識嘆，只要間舖做得好，唔使擔心無人嚟。
前排，我去咗一間食店，嗰度嘅日本燒肉好出名，每次去都見到好多人大排長龍，因為實在太多人，商場保安哥哥同我講要預排兩個鐘，所以頭兩次我都放棄咗，結果第三次終於畀我排到。呢間舖頭教識我，請孔明出山要三顧草廬，原來好食店都要有三次排隊嘅決心。
特首話，每10間店關門大吉，就有16間店開業。先唔討論開業同關門嘅數字，而家事實係有兩個情況: 一；舖租的確平咗，令開業成本輕咗。二；只要間店做得好，香港人係樂意排住隊幫襯。古語有云，波係圓嘅，依家係最壞嘅時候，亦係最好嘅時候。
言平
本欄隔周四刊出
