金融花生│減派息保本保命(言平)
2018年9月,萬科(2202)喺自己月度例會上講,房地產行業轉折點嚟咗,「活下去」係最終目標。當時大家笑佢太瘋癲,原來大家看不穿。到2024年1月,恒隆陳啟宗交棒畀個仔陳文博時,同傳媒講集團方向係「保本保命」,市場已經見到潮退,明白呢次唔係譁眾取寵。
美股外幣即時報價 多國新聞任睇
陳文博接手後,7月出第一份成績表,恒隆地產(101)同恒隆集團(010),上半年純利分別跌咗56%同47%,好似好得人驚,但呢個市況,物業公允值實會對呢類地產股有好大拖累。睇返核心盈利,都係分別跌22%同18%,算係可接受,尤其兩間公司大陸生意多過香港,早佢5年半話要活下去嘅萬科,都出咗盈警上半年蝕70到90億,同係藍籌內房嘅龍湖(960),上年全年核心盈利都要腰斬,所以恒隆份業績真係算係咁。
條數唔係太差,但晏晝出完業績股價跌12%收市,主要就係派息按年少咗33%。而家港股投資者唔會同你客氣,上市公司保證唔到回報就會俾人狠沽。
倘變新常態 港股好大鑊
過去3年,恒隆地產全年派息比率大約9成,就算行政總裁盧韋柏話今次減派息係為咗年尾唔使再減係真,好粗略咁以上半年盈利下跌情況估算全年,EPS大約得0.5元,如果維持9成派息率股息都係得0.45元左右,比舊年全年派0.78元都會跌好多,但呢個已經係偏樂觀估算,因為過往3年,恒隆地產上半年EPS都會好過下半年,即係今年全年EPS有無0.5元都唔肯定,所以投資者同股東根本計唔掂條數,惟有先將個價推低去就返個回報。
但你可能睇報價機,7月30日跌完股息率有13厘幾喎,呢個係用上年個股息除出嚟嘅股息率,未反映最新情況,股壇新手千祈唔好傻豬豬俾人老點。
減派息當然對投資者同股東好不利,但呢個對企業嚟講,真係保本保命之法,學佢哋管理層話齋,睇唔通幾時會回復,企業喺派息同保命議題上,究竟對股東負責任,定係對員工負責任,呢個係哲學問題,好難畀答案。但呢個情況如果成為港股新常態,港股就會更加大鑊。
言平
本欄隔周四刊出