雅虎香港財經 金融花生│美國短期唔減息拖冧港股？天真！（言平）
美國近期啲經濟數據持續轉強，唔單止3月份核心消費價格指數CPI按月及同比雙雙高於市場預期，連3月份非農新增職位亦遠高於市場預期，唔少美國聯儲局官員都大跌眼鏡，承認自己之前放錯鴿。由於數據繼續反映出美國整體經濟動力強勁，令到美國聯儲局主要官員，包括主席鮑威爾，以及紐約聯儲銀行行長威廉姆斯都表示美國息率水平要維持在高位一段較長時間，甚至如果有需要時會再加息。言論一出令原本講減息機會亦消失得無影無踪，更將今年頗強嘅美股震散，各主要美股指數均由高位回調超過8%。
美股外幣即時報價 多國新聞任睇
港股與美股係命運共同體
由於港股與美股係同一命運共同體，今次亦回調至接近16000點水平先開始回穩，不過，恒指總算未跌到低過1月份水平，按走勢港股已算有較強抗跌能力。相信係同特區政府之前樓市撤辣，同埋中央政府持續向特區送禮，令到港股投資者信心逐步恢復。另外，過去幾年打算離場嘅機構投資者早已走得八八九九，現時未有離場嘅機構投資者，相信亦唔會喺低位反彈期間離場，因此，即使美股出現大跌，港股所面對沽售壓力亦無之前咁大。
恒指以現價計算，預測市盈率只得9.5倍左右，整體估值唔算好高，呢個水平相信會令多數投資者以「睇多一陣」作為短期策略，尤其以之前3年恒指市盈率平均值作為目標，其實只有11.8倍，若只用過去兩年恒指市盈率平均值作為目標，更只有10.9倍。因此，以9.5倍市盈率去計，港股的確唔算貴，令到揸咗貨嘅投資者唔會願意係咁低水平沽貨離場，所以，股市上確實睇唔到有大量沽盤出現。
反彈目標18860
現時市況仍未重返牛氣迫人階段，投資者趨向較為保守，如果恒指能繼續反彈，並以過去兩年市盈率平均值10.9倍作為目標嘅話，恒指大概可以升到去18860點左右便會開始見到阻力。至於好多讀者都想知，除咗港股可以升到去邊外，更加想知道邊度有支持。以過去5次恒指見底反彈前市盈率平均值，作為預測恒指出現支持水平，若果過去5次恒指見底前平均市盈率為8.37倍，恒指理論支持位會喺14455點，同今年1月低位14794點其實只相差2.3%，亦較現水平不足15%的下跌幅度。因此，港股即使要跌，都仍然係有限數，千祈唔好相信美國一旦唔減息，就會跌到四腳朝天呢種睇法。
言平
本欄隔周四刊出
