金融花生│青蛙王子阿里(言平)
前排鬧到滿城風雨阿里王子(Sheikh Ali Rashed Ali Saeed Al Maktoum)家族辦公室事件又有新進展。話說原定今年3月泵5億美金嚟香港開設家族辦公室嘅阿聯酋杜拜王室成員阿里,早幾日《南華早報》報道,位於上環嘅阿里王子家族辦公室招牌已經被拆咗落嚟。下?咁即係成件事本身係一個「搭雞棚」鬧劇?定係有其他耐人尋味嘅隱情?
美股外幣即時報價 多國新聞任睇
毋須執著王子歌手身份
首先,大家根本唔需要太執着佢係王子定係菲律賓歌手,香港既然打開門搞家族辦公室,應食四方飯。佢係王子又好、歌手又好、甚至街市賣菜婆都好,只要有錢入嚟,正正當當,背景根本唔重要。《三國演義》入面都有教啦,劉備 - 劉皇叔,中山靖王之後,點止係王子,輩份重高,係皇叔呀,但又如何?劉備都只係賣草鞋為生,相反住緊公屋嘅何伯,閒閒地都有幾百萬現金喺手,仲有何太日日煲靚湯比佢飲。所以,阿里身份係咪王子根本完全唔重要,最重要係佢有無錢,更何況沙特王室成員咁多,妻妾成群,又好生養,就算係王子都唔一定分到好多而大富大貴。
有錢佬愛低調行事
另一件事亦係大家忽略咗,搞家族辦公室又好,做其他咩事都好,好多時,特別喺啲有錢佬,都想低調行事,唔想畀咁多人知佢做緊咩,特別係佢哋身家放喺邊呢啲敏感題目。但偏偏成件事搞到有咁高調得咁高調,大鑼大鼓,驚死街坊街里唔知咁,如果我係阿里,我都縮沙走人。鄉下沙特有咁多遠房親戚,始終唔係個個有錢,咁高調被人睇你副身家,之後都係濕滯。
雖然直到呢刻,都未有證據證明阿里究竟係青蛙定係王子、究竟係空心老倌定係大疊水富豪、定係「搭雞棚」鬧劇抑或佢自已冚牌唔去。但無論如何,經一事、長一智,下次接到另一單大茶飯,先查清楚個背景,重有,正如國家領導人所講,「悶聲發大財」呀!
言平
本欄隔周四刊出