Beyond Meat係食品界Tesla？

得力於業績靚仔兼預告全年收入可望破2.1億美元，人造肉股王Beyond Meat上周五股價再爆升。有美國散戶更認為Beyond Meat已晉升為食品界的Tesla，視為唔炒走寶的星級美股。既然係咁，就不妨拎Beyond Meat同Tesla比一比。

Tesla股價由強轉弱，巧合地都涉及兩大因素。一是具星味的掌舵人Elon Musk，這名現實版Iron Man，既擁有人氣富豪的特色（如擁有明星女友、外表型仔等），另一強項係言論夠爆。當市場憧憬Tesla前景無限時，他在Twitter一句豪言就足以令股價爆升。但當Tesla問題浮現時，他的敢言就不斷成為震散Tesla股價炸彈。

Elon Musk尚有一大問題，就係偏好開多條巨型戰線，本業電動車已經夠煩，他更開闢科幻級的太空船及隧道工程業務。Tesla當旺時他這種營商風格當然予人厲害感覺，但Tesla問題浪接浪時，大家就會嫌他做事不夠專心了。

反觀Beyond Meat，創辦人Ethan Brown形象似一名美國農夫多過企業家（事實上佢阿爸真係有一個農場），相對Elon Musk無疑踏實得多，而且多年來都唔覺他有開闢多條生意戰線的動作，即使他本身係搞燃料電池出身，他都未有趁電動車熱潮大搞相關業務。另一重點係Ethan Brown唔算係超級KOL，不會像Elon Musk在Twitter隨心開炮，由此觀之，大家都係增長股，Beyond Meat就沒有Tesla的「創辦人風險」。

Tesla另一標誌因素係高負債，現時負債比率高達139%。當大家憧憬Telsa貨如輪轉時，高負債就被視為生意越做越大指標，但隨著產能及市場需求減少問題出現，負債就成為企業生命值急降的警號。

至於Beyond Meat，2016及2017兩個財年負債比率分別達290%及244.3%，今年則急降至41%，較大家熟悉的食品股如萬洲、統一更低，再加上管理層講明今年收入2.1億美元係保守估計，講財務狀況，明顯Beyond Meat就較Tesla像樣得多。

Beyond Meat與Tesla尚有一大共通點，大家都係推銷環保及未來生活概念。然而相對價格離地的頂級電動車，多汁人造漢堡扒即使較一般漢堡扒售價貴一截，不少中產都負擔得起，從這方面睇，其實人造肉市場可能更巨大。

雖然Beyond Meat基本因素似乎較Tesla更吸引，但要留意現價真係唔平，而且市場上有多個實力強勁的同行，一旦這類同行排隊上市，Beyond Meat股價長升長有神話難免告終。除非你早在上市頭幾日已掃入並適度減持取回購買成本，否則投資Beyond Meat策略都係小注炒波幅為妙。

===============

精選資訊網站「中環街市」 臉書粉絲頁